Shillong, Naitung 30 : Ka UDP Mawlai Circle ka pynpaw ka jingsngewkhia jur halor ka jingshah lehbeiñ jong ki khynnah skul Jawahar Navodaya Vidyalaya ha ka jylla khamtam kumba la jia dang shen ïa ka JNV Niangbari ha kaba ki khynnah skul ki ïoh da ka um ba jngut ban dih, ki jingbam kiba la sma, ki dawai kiba la dier por bad kumta ter ter.
Na ka liang u Adviser jongka UDP Mawlai Circle u bah P.T Sawkmie uba dei ruh u MLA ba rim ka Mawlai u la pynpaw ba ka UDP Mawlai Circle kam sngewïahap shuh ïa kane ka jingshah lehbeiñ ki khynnah skul ha ki bor pynïaid bad kane ka pynpaw ba kim don ka jingkitkhlieh kum ki nongpeit nongkhmih ïa ki khynnah.
U bah Sawkmie u la ong ba ka UDP Mawlai Circle ka dawa ba dei ban sospon noh mardor ïa ki bor ba dei peit ïa katei ka skul khnang ba kan long ka jingsneng ïa kiwei kiba peit kum ha Mawphlang bad ha kiwei kiwei ki district ruh. “ U Deputy Commissioner u la dei ban leh la ka jongka kamram halor kane ka jingjia ha katei ka skul namar kane khlem pep kan ktah ïa ka jingkoit jingkhiah ki khynnah skul namar kumba paw na ka jingbym biang ka umdih bad ki jingbam ki la don ki khynnah kiba la poi hospital ruh. Haka jingshisha ki skul ki ju hikai ïa ka jinglehkhuid bad jinglong beit haka jinglong jingim hynrei kane ka skul ka la pheil ha baroh ki liang” ong u bah Sawkmie.
Kiba kum kine ki jingjia ki DC ki dei ban leh ma mar da ka kam ym dei ban ap haduh ban da wan ka hukum na ka sorkar. Nalor kata wat ki bor ba halor ka tnad pule puthi ruh ki dei ban leit jurip ïa kine ki skul namar wat la ki dei ki skul sorkar pdeng hynrei ki don hapoh ka jylla bad kiba bun ki khynnah skul ki dei napoh ka jylla khnang ba kin ïohi kumno ki bor pynïaid ki leh bad lada ki leh palat ruh ba kin ïïoh ban leh ïa kaba donkam, pynkut u bah Sawkmie.
