Nongpoh, Naitung 26: Namar ka jingïai tuid jong ki bar jylla ban wan trei bylla sha ka jylla Meghalaya khlem da pynbiang ïa ki kot ki sla kiba biang, ka Ri-Bhoi Youth Organisation (RBYO) mynta ka sngi haka jingïalam u Samla Baiateilang Lapang kum u President ba rangbah ryngkat ki dkhot ki la leit ban khynra naphang ïa ki karkhana ot dieng kiba la pyntrei da ki bar jylla haka thaiñ Umling.
Ha katei ka jingleit khynra jong ka seng, la lap ruh ba ki trai karkhana ki buh da ki nongtrei bar jylla ki bym don kot don sla kiba biang ha kaba na ka liang ka seng ka la pyntip ruh sha ki pulit jong ka tnad Infiltration ba kin wan shaw ïa ki bad pynphai sha ka jaka ba kidei ban leit namar kitei ki bar jylla ki khlem lah ban pyni ïa ki kot ki sla ba biang khamtam ka labour license.
U Bah Baiateilang Lapang, haba kren sha ki lad pathaikhubor, u la pynpaw ïa ka jingsngewkhia ban lap ba ki don shibun ki bar jylla, kiba la wan trei mon sha ka jylla, khlem ki kot ki sla kiba biang, watla na ka liang ki seng bhalang ki ju pynlong ka jingkhynra bar jylla na ka por shaka por, kiba lah pynban ban wanrah ki kam sniew bad ym lah ban tip kitei ki jylla kiba wan trei bylla ki ju don ruh kiba leh shibun ki kam sniew.
Na ka liang utei u nongïalam ka RBYO, u la kyntu ïa ki kontraktor ne ïa kino kino kiba donkam nongbylla, ba kim dei ban khot ïa ki bar jylla kiba ym don ïa ki kot ki sla kiba biang bad lada ki khot da ki nongtrei bar jylla ruh, ki dei ban pynbiang ïa ki kot ki sla ha shuwa ba kin wan trei sha ka jylla.
