Shillong, Naitung: Ka Meghalaya State Skill Development Society (MSSDS) ka la rakhe ïa ka “World Youth Skills Day” ha ka 15 tarik mynta u bnai halor ka mat “Skilling teachers, trainers & youth for a transformative future”.
Ka jingthmu ha kaba pynlong ïa kane ka prokram ka long shibynta ban pynpaw halor ka jingdon kam ïa ka jingtbit bad ka jingshemphang na ka bynta ki lad ïoh kam ïoh jam bad ban seng ïala ki jong ki kam ki jam hapdeng ki samla bad halor ka jingdonkam ïa ka lawei ka jong ki.
Kane ka dei ka sngi kaba kongsan ka ban plielad na ka bynta ki kynhun kiba thaw ïa ki polisi treikam, ki nongai kam, ki kynhun kiba trei na ka bynta ka roi ka par ba kin ïoh ban ïamir jingmut bad ki samla halor ki sap ki phong kiba donkam na ka bynta ka ïoh ka kot bad ka roi ka par kaba neh.
Dei tang ka sap ka phong kaba lah ban kyntiew ïa ka ri bad ki briew jong ka sha ka lawei kaba kiew shaphrang bad kaba neh, bad ka Meghalaya State Skill Development Society (MSSDS) ruh ka rakhe ïa ka sngi ‘World Youth Skills Day’ lyngba ki khana jong ka jingjop.
Ha kane ka prokram la ïa don lang ruh u Challienkhum Songate, (IRS), Principal Secretary ka tnat Labour kum u Kongsan bad I Kong Isawanda Laloo, IAS kum ka Symbud Kongsan.Kane ka sngi ka la nang pynïoh mynsiem shuh shuh lyngba ki nongai jinghikai na ki tnat bapher bapher lyngba jong ka Skills Meghalaya program.
Nalor kata kum ka dak jong ka jingithuh halor ka jingnoh synñiang ha kaba ïadei bad kane ka bynta la pynlong ruh ka jingsam khusnam na ka bynta ki 10 ngut ki nongai jinghikai kiba don ha ka kyrdan kaba shiphew, ha kaba ïa ka khusnam Best Trainee Award bad ka Award of Appreciation ka leit sha ki nongtrei jong ka MSSDS.
La ïoh ruh ïa ka jingrwai ba la thaw hi halor ka jingdonkam ban tyngkai ïa ka por lyngba ka Ka Kynhun ki Syrdeng kaba pynkynmaw ïa ki samla halor ka jingkut jingmut kaba mih lada ki nang ban pyndonkam ïa ka por.Kumta la pyni ruh ïa ka jingïalehkai lyngkot ba la ai kyrteng “What Matters” lyngba ka kynhun Chiiung Group nalor ka jingshad ba la pynbit pynbiang da ka Eastern Dance Icons.
Ka ‘World Youth Skills Day’ ka pynkynmaw halor ka jingdonkam ban kyntiew ïa ki sap ki phong jong ki samla khnang ba kin lah ban thaw ïa ki lad aikam aijam.Ka MSSDS ka la pynrung kyrteng haduh kumba 9000 ngut ki nongshah hikai bad jan kumba 4000 ngut kiba la ïoh jinghikai tang hapoh jong ka Skills Meghalaya bad ïai don ïa ka jingkut jingmut ban pynkup bor ïa ki samla ka jylla Meghalaya lyngba ki sap treikam bapher bapher.
Ki samla kiba don jingthmu ki lah ban leit mih sha ka ophis ka MSSDS ha Grove Site Building, 3rd Floor, Keating Road Shillong, bad na ka bynta ki jingtip kiba kham bniah ki lah ruh ban leit lyngba ka website @www.mssds.nic.in.
