Tura, Naitung 11 : Ki dkhot ka ACHIK bad kiwei ki sengbhalang ki la sdang ïa ka jingïashah jingit mynta ka sngi Ba-ar mar pyrshah ka Mini Secretariat kaba don ha Dakopgre, Tura.
Haba ïakren bad u Nongai khubor, u Labenn Ch Marak Executive Member ka Council of Elders, ACHIK ula ong “ Ngi la pyrshang ban ïakynduh ïa u Myntri Rangbah bad ka Sorkar Meghalaya hynrei ngim shym la ïohlad satia lane don kano kano ka jingaiktien. Ngi kwah ïa ka Sorkar ba kan sngap lem ïa ngi bad ai lem ka por ban ïashong bad ïakren”.
“Ngi kwah ban long shai halor ka Job Reservation Policy. Hato kan don ne em” ula ong.
Ula ong ruh “Ngi la ïohsngew ba ki ïakren halor ka jingpyntreikam ïa ka Roster nangne shakhmat bad ïohsngew ruh ïa ka jingken ka Kong Ampareen ha ki lad pthai khubor. Kane ka pynartatien ïa ngi. Ngi kwah ba ki Nongmihkhmat ka Sorkar kin wan ïakynduh ïa ngi, ngi kwah eh ïa ka jingïakren bad u Myntri Rangbah hi” ula bynrap.
“Ngi ki ACHIK ha ryngkat kiwei ki Sengbhalang ngi la ïalum hangne, mar pyrshah ïa ka Mini Secretariat ban ïashah jingit namar ka jingsngap jar jar ka Sorkar ïa ka jingkwah ïakren halor ka JRB bad ka Roster System nalor ka jingdawa ïa ka Winter Capital” ula ong.
