Pyrshah ka JHADC ïaka jingthmu pyntreikam ïa ka UCC, ba ktah ïa ka Riti ka Dustur

Jowai, Naitung 10: Ka Dorbar Lyiur jong ka Jaiñtia Hills Autonomous District Council (JHADC) kaba la long mynta ka sngi 10 tarik kala rai ban pyrshah ïa ka jingthmu pyntreikam ïa ka Uniform Civil Court (UCC) hapoh ka JHADC da ka sorkar kmie katkum ka jingbthah jong ka 22nd Law Commission of India dated 14th June 2023 kaba la ai por lai phew sngi ban ai jingtip sha ka Law Commission of India.
Ha kane ka Dorbar baroh ki MDC naduh ka liang synshar bad ka liang pyrshah kila pynpaw ka jingpyrshah jur ban pyntreikam ïa ka UCC lyngba ka Resolution ba la wanrah da u CEM ka Council u ma Thombor Shiwat da kaba pynsngew ba kane ka UCC ka lah ban ktah ïa ka Riti ka Dustur bad ka jinglong tynrai jong ka jait bynriew.
Shuh shuh la ïatai da kitei ki MDC hapoh ka Dorbar lada pyntreikam ïa kane ka UCC hapoh ka JHADC wat ïa ka bor jong ki Dolloi, ki Waheh Shnong, ka jingshim jait na ka kynthei, ka jingkyntiew kurim kin duh kin dam noh bad ka long pyrshah ïa ka riti synshar kaba la kdew ha ka Six Schedule jong ka Constitution ka Ri.
Hadien kane ka jingïatai da kawei ka sur ka Dorbar kala rai ba ym pdiang ïa kane ka jingthmu ban pyntreikam ïa ka UCC bad la rai ruh ban phah noh mardor ïa ka jingthoh halor ki nongrim ban pyrshah jur ïa ka sha u Lat ka jylla.