Shillong, Naitung 10 : Ka sorkar jylla lyngba ka tnad Pule Puthi ka la pynbna ba shen kan sa pyndap noh ïa ki kam nonghikai kiba la don palat 1200 tylli ha ki skul Government Lower Primary ne ki skul LP jong ka sorkar hapoh kine ki arbnai ban wan.
Ïa kane la pynbna da u Myntri ka tnad Pule Puthi ka sorkar jylla, Rakkam A Sangma uba la pynti ruh ba ïa ka jingpynbna yn sa pyllait paidbah la kumno kumno ha ka 14tarik mynta u bnai.
“Shen yn sa pyllait ïa ka jingpyntip paidbah na bynta ban pyndap noh ïa ki 1200 tam ki kam nonghikai kiba la pyndep ai ka Meghalaya Teachers’ Eligibility Test (MTET) ha ka jylla,” u la ong.
U Myntri u la ong ruh ba ka tnad kan pyrshang ruh ban pyndep ïa kane ka kam hapoh ki ar bnai. “Ngin pyrshang wat ban pyndep noh ïa ka hapoh ka 15tarik u Nailar hynrei ngin pyndep beit ïa ka hapoh ka arbnai,” u la ong.
Haba pynshai pat haba ïadei bad ki 18,000 ngut ki nonghikai bym pat shah pyntbit ha ka jylla, u Myntri u la ong ba ïa kane ka ishu ki la kren ruh ha ka jingkynduh bad u Myntri ka tnad Human Resources Development ka sorkar pdeng ha nongbah Delhi. La ïathuh ba ha katei ka jingïalang la ong ba ka jylla ka lah ban phah pyntbit ïa ki nonghikai lyngba ka IGNOU lane ha ka NIOS
