Shillong, Jylliew 23: Ka jingïalehkai hynnin ka Sngi napoh ka Group-B ka la jam sha kaba kut ha kaba ka kynhun ki thei ka Mawlai SC ryngkat bad ka Lumparing SC ki laïoh ban bteng ïa ka lynti ïaid da ka namjop jong ka lympung Shillong Sports Association’s Women’s League kaba la pynlong ha Third Ground, Polo.
Ka lahduh jong ka samoi ba ladep, kata ki thei ka Mawlai ka la sdang ïa ka lynti ïaid da kaba plie pyrda ïa ka namjop da 7-1 kol pyrshah ïa ka Kharang SC ha ka jingïalehkai kaba nyngkong, katba ka Lumparing ka la pynjemkhnap ïa ka Iasnohktilang Madanrting FC da kaba pynbam haduh 8-0 kol ha ka jingïalehkai kaba bud.
Ka In-ri La-i-dor Khongthaw ka la ïoh ban khyrwit haduh saw kol na ka bynta ka kynhun bad baroh ki kol ka la ïoh ban thep ha ka wat ba ar (54′, 57′, 61′, 66′) kaba la ïarap suk ïa ka Lumparing ban knieh jyndat ïa ka namjop na ka kti jong ka Iasnohktilang.
Ka kapten jong ka kynhun Lumparing,ka Sidaris Khongwet ka la ïoh ban thep ar kol bad ka dei maka kaba la sdang ban plie pyrda nyngkong ban pynkhihjar (5′, 22′), ryngkat bad ka Iaphishisha Marbaniang kaba la ïoh thep mar katjuh (33′, 50′).
Haba phai sha ka jingïalehkai kaba nyngkong, ki thei kiba la ïoh ban pynkhihjar na ka bynta ka Mawlai ki kynthup ïa ka Makrisha Songthiang (3′, 47′) bud sa ki kol na ka Napaleroiki Lytan (29′), Aibaplielad Skhemiew (31′), Charlinda Nongtdu (66′), Ideibanri Kharpan (68′) bad ka Baiahun L Nongbri (70′). ka kol na ka bynta ka Kharang kaba nyngkong la ïoh ban thep da ka Damansani Kharsahnoh (41′).
Katba lashai ka sngi yn nym don jingïalehkai Women’s League tad haduh ka 3 Jylliew, ha kaba ka Laitkor SC kan sa ïakhun pyrshah ïa ka Kick Start Football Coaching Centre at 2:30pm, bud sa ka jingïalehkia hapdeng ka Lawei Smit SC pyrshah ïa ka PFR Academy ha ka por 4:15pm. Baroh ar tylli ki jingïalehkai kin dei napoh ka Group A.
