Mawkyrwat, Jylliew 23: Ka lympung ïalehkai jong ki khynnah skul kaba la tip kum ka “South West Khasi Hills District Level Inter School Subroto Mukherjee Cup Football Tournament 2023” ba la pynïaid da ka ophis jong u District Sports Officer, South West Khasi Hills District mynta ka sngi ka la poi noh sha kaba kut ha kaba ka Rangthong Christian HSS jong ki kynthei 17 snem, ka Upper Mawbidong SS jong ki shynrang ba 14 snem bad ka Rangthong Christian HSS jong ki shynrang 17 snem ki la rah ïa ka nam lahduh hapoh madan Artificial Turf, MDSA, South West Khasi Hills District.
Haba phai ha ka jingïalehkai ba nyngkong, la pynïaleh ïa ki khynnah kynthei ba 17 snem hapdeng ka Sakwang Presbyterian Higher Secondary School pyrshah ïa ka Rangthong Christian Higher Secondary School ha kaba ka Rangthong Christian HSS ka ka rah ïa ka nam jop da 1 – 0 kol ba la thep da ka Ibawansuk Syiemlieh ha ka minit kaba 22.
Ha ka jingïalehkai kaba ar pat kaba dei jong ki khynnah shynrang ba 14 snem, la jop da ka Upper Mawbidong Secondary School da 3 – 0 kol pyrshah ïa ka Phlangkynshi Upper Primary School bad ïa ki kol la thep da u Ferdyson Shangdiar ha ka minit kaba 16, 39 bad 47. Katba ha ka jingïalehkai kynjatbol ba khadduh kaba dei jong ki khynnah shynrang ba 17 snem hapdeng ka Kerlin Secondary School bad ka Rangthong Christian Higher Secondary School ka la kut noh da ka Tie Breaker ha kaba ka 2 – 0 kol.
Hadien ka jingïalehkai, la ïoh ba sam ïa ki khusnam sha baroh hynriew tylli ki kynhun kata lai tylli kiba rah ïa ka nam jop bad la tylli kiba shah rem noh.
Ïa kane ka “South West Khasi Hills District Level Inter School Subroto Mukherjee Cup Football Tournament 2023” la wan ban pynhap pyrda noh da u bah T. Lyngwa, IAS, Deputy Commissioner, South West Khasi Hills District ha ka jingïadonlang naduh u bah D. Mawleiñ, Deputy SP, South West Khasi Hills District, ka kong Y. Mawlong, MCS, Additional Deputy Commissioner, South West Khasi Hills District, u bah D. Syngkon, District Sports Officer, South West Khasi Hills District, ki nonghikai, ki khynnah skul lem bad kiwei de ki ‘riew rangbah.
