Khyllem ka kynroh ha PA Sangma Stadium, julor 6 ki kali, phah tohkit u DC ha u Magistrate

Tura, Jylliew 22: Ka Stadium kaba la tei da ka sorkar MDA ba la ïalam da u Conrad Kongkal Sangma, ban pynsahnam ïa u Purno Agitok Sangma, uwei na ki nongïalam ba radbah jong ka jylla, ka la khyllem shi bynta na ka kynroh kaba ker ban pynneh ïa ka madan.
La tei ïa kane ka Stadium ha ka jingpeit hi u Conrad kum u Myntri Rangbah uba dei u khun jong u Purno ha ka jinglut kaba 127.7 Klur tyngka.
Kane ka kynroh kaba don ha syndah jong ka Cover Gallery bad ha syndah jong ka surok ha nongbah Tura. Ka kynroh kaba la tei da ka dewbilat ka la khyllem bad ka khyndew ka la tuid sha surok ha kaba 6 tylli ki kali bad kawei ka thuk thuk ki la julor. Ka khyndew ka la tuid ruh sha surok bad pynwit ïa ka leit ka wan.
Kane ka jingjia kaba la jia mynta ka sngi haka por mynstep ka la paw shuh shuh ha ki lad pathai khubor, haba ka la mih ka jingkynnoh ba dei ka Kompeni kaba tei ïa kane ka Stadium kadei ka Badri Rai Company (BRC) kajuh ka kompeni kaba la tei ïa ka ïingdorbar thawaiñ ka jylla ha Mawdiangdiang, ha kaba u tnum pyllun ne u dome u la khyllem ha ka 22 tarik u Jymmang 2022.
Hynrei na ka liang u Commissioner & Secretary ka Sports Dept, u la pynshai ba ïa kane ka Stadium la shna da ka Hindustan Steel Work Construction Ltd.
Lah ban kdew hangne ba ïa kane ka Stadium ba la tei lyngba ka pisa jong ka sorkar pdeng na ka Ministry of Tribal Affairs, la plie da u Conrad Sangma ha ka 16 tarik u Nohprah 2022 wat lada kibun ki bynta jong kane ka Stadium ym pat dep bha.
Hynrei ha ka sngi ba plie ïa kane ka Stadium, u Myntri Rangbah, u la pynpaw ka jingsngewkmen da kaba ong ba kadei ka jingphoh sniew kaba la urlong jong ki paidbah ka Tura bad jong ka Garo Hills hi ruh baroh kawei. U la kren kop ruh ba kadei ka Stadium kaba la da shna kyrpang katkum ka jingstad jong ka juk ba mynta.
Kadei kajuh ka Stadium ruh kaba ha u bnai Rymphang mynta ka snem ka la paw ha ki National Media, haba ka sorkar u Conrad ka la kyntait ban ai jingbit ïa ka Seng BJP ban pynlong ïa ka jingïalap elekshon da u Myntri Rangbah Duh, u Narendra Modi.
Kadei kajuh ka Stadium ruh ha kaba u Myntri jong ka sorkar pdeng ba peit ïa ka Tribal Affaris, haba u la wan sha Tura ryngkat bad ki nongïalam ka BJP na Meghalaya u la kynnoh ba ka don ka jingbamsap kaba jur ha kaba tei ïa kane ka Stadium. Ïa kane ka jingkynnoh la kyntait mardor da u Myntri Rangbah ka jylla.
Ha kaba ïadei bad ka jingkhyllem kane ka kynroh, ki paidbah na Tura ki la kynnoh ba ka don ka jingtrei torti ha kaba kam don ki nala kiba biang ha ka madan bad ka um ka la sahkut ha madan.
Nangta ki la kynnoh ruh ba kadei ka jingbym biang ka rukom tei ïa ki paia bad kiwei kiwei de ki jingkhleh dewbilat.
Mar syn khyllem kane ka kynroh ha ka Stadium, ka MP jong ka Tura bad ka khun kynthei jong u Purno Sangma, ka Agatha Sangma ka la leit jurip kyrkieh bad pynpaw ka jingbitar ïa kane ka kompeni kaba tei ïa kane ka Stadium.
Na ka liang u DC jong ka West Garo Hills District, u Jagdish Chelani, u la thung da ka jingtohkit ban khlieh da u Additional District Magistrate.