Nongpoh, Ïaiong 29: Ki samla jong ka shnong Umsning Proper A mynta ka sngi ki la ïoh ban pynlait im noh ïa uwei u khla rit ba la ju tip paidbah kum u khla thap sim na kawei ka kper khlaw kaba don ha Umsning.
Kine ki samla kila lap ïa utei u khla rit ha katei ka kper katba ki dang ïaid ha katei ka kper bad dei ha kum kane ka por ba ki la leit ban kem noh ïa utei u khla rit da ka jingthmu ban pynlait im bad ba kiwei kiba shim kabu kin nym ïoh lad ban pynïap ïa utei u khla rit.
Kine ki samla kiba la lap bad ioh ba pynlait im ïa utei u khla ri ki kynthup ïa u samla Nathaniel Kylla, Augustin Makri, Billbud Syiemlieh, Samuelson Malieh, Alexzandri Kylla, Kevinson Malieh bad u samla Samanta Pathaw na ka shnong Umsning Proper A. ha Ri Bhoi.
Kumba la pyntip da u Rangbah Shnong, u Bah A. Khonghat la ong ba hadien ba la pyntip sha ki bor shnong da kitei ki samla halor kane ka jingioh kem ïa une u khla rit, na ka liang ka shnong bad kitei ki samla ki la leit aiti noh ïa une u khla rit sha Umsning Police Outpost khnang ba kin ioh ban aiti noh ïa une u khlaw sha ka tnad Wildlife kaba dei peit ïa ki mrad ki mreng hapoh ka Ri Bhoi.
