Ïaid shaphrang ka jingpynkhreh ka MSOA ïa ka Meghalaya Games 2022

Shillong, Ïaïong 29: Ka jingpynkhreh jong ka Meghalaya State Olympic Association (MSOA) bad ka Directorate of Sports and Youth Affairs ban pynlong ïa ka Meghalaya Games 2022 kala ïaid shaphrang bad satang ban pdiang noh ïa ka sngi ïalehkai ha kaba ki staff, volunteer bad ki athlete kin sa wan ban ïashim bynta ha kane ka lympung ïalehkai kaba heh duh hapoh ka jylla.
Ka MSOA ha ka sngi Palei kala pynlong ka jingïakynduh lang ha ryngkat ki synjuk ïalehkai bapher bapher kiban sa ïashim bynta ha kane ka lympung. Ha Polo kaba dei ka jaka pdeng ban pynlong ïa ki jingïalehkai, la pynkhreh nadong shadong ban pynlong ïa katei ka lympung ha ka taïew ban wan.
Ïa kane ka lympung ïalehkai yn plie pyrda ha ka 3 tarik Jymmang ha ka por 3 baje janmiet ha madan First Ground, Polo, Shillong ha kaba u Myntri Rangbah ka jylla u Conrad Kongkal Sangma un don lang kum u jongsan, katba u Bah Banteidor Lyngdoh uba dei u Myntri ka tnad ki kam ïalehkai un long kum u symbud kongsan.
Shwa kane ha ka 2 tarik Jymmang yn pynlong ïa ki katto katne ki jingïalehkai na ki katto katne ki daw katba ka ka jingplie pyrda kaba pura kan long ha ka sngi kaba bud. Ha kane ka lympung la shah sngewbha ïa baroh ki nongpeitkai ban wan ai jingkyrshan ïala ki jong ki nongïalehkai khlem da donkam ban siew eiei.
“Ki Association bad ki athlete kida sngewkmen palat bad kwah noh ban sdang ki jingïalehkai,” ong u Bah John F Kharshiing uba dei u Working President jong ka MSOA.
Na ka liang u Bah Finely Pariat uba dei u General Secretary ka MSOA haba bynrap lang u la ong, “Ka jingshim bynta lang ki state association ka wanrah ïa ka jingïalehkai kaba kiew shaphrang.”
Ïa ka sngi pynhap pyrda ïa kane ka lympung yn pynlong ha Indoor Stadium jong ka Sports Authority of India (SAI) kaban long ha ka 6 tarik Jymmang. Baroh ki 2,600 ngut tam ki athlete kin sa leitphai noh hala ki jong ki jaka sah ha ka sngi kaba bud. Kat haduh mynta, la ïoh jingkheiñ ba ki don 2,069 ngut kiba la pynrung kyrteng ban ïashim bynta ha kane ka lympung bah bad la khmih lynti ba kin dang don shibun kiban sa pynrung kyrteng ha kine ki sngi ba dang sah.
Na ka jingseisoh ka jingpynlong ïa ka wat kaba lai jong kane ka lympung kaba la pynlong ha u Rymphang 2020, mynta u snem pat ki nongïalehkai kin ïoh ban ïashim bynta ha kiba bun ki jait jingïalehkai.
Ym tang ba kan kiew ki athlete sha ka 1,000 ngut, hynrei wat ki jait jingïalehkai mynta ka kynti la kyntiew sha ka 19 na ka 14 tylli kaba la pynlong ha u 2020.
“Ka long kaba eh ban kyntiew na ka 14 sha ka 19 tylli hynrei buh jingmut ba na bynta ka 39th National Games ngin hap ban pynlong haduh 36 tylli ki jait jingïalehkai bad ngi dang kynjoh tang mar shiteng,” ong u Bah John,da kaba bynrap ba ka MSOA ka dang ïapyrkhat ban pynlong ïa ka Meghalaya Games shabar na ka Nongbah Shillong, kum sha Garo Hills.
Baroh ki 14 tylli ki jait jingïalehkai bala pynlong ha u 2020 mynta u snem ruh kin sa ïoh wanphai biang kum ka archery, athletics, karate, table tennis, badminton, basketball, billiards bad snooker, tennis, boxing, judo, taekwondo, shooting, swimming bad ka wushu.
Bad mynta ka kynti la pynrung shuh sa san jait ba kynthup ïa ka football, gymnastics, weightlifting, golf bad ka cycling.