Shillong, Nailur 1 : Ka jingsangeh treikam ba khlem pud jong ki nongsaid aiñ ha Meghalaya kan dang bteng, ong ki Bar Association namar ba ka jingïalang bad ka Chief Justice lem bad u Myntri kam Aiñ u Bah Lahkmen Rymbui ha ka Sngi Ba-ar, kam shym la lah ban pynurlong ïa ki jingdawa ban weng noh ïa u Amit Kumar kum u Advocate General.
U Secretary ka Shillong Bar Association Bah TL Jyrwa ula ong ba ka jingïakhih ka dei kaba ïalam lang da ka Shillong Bar Association bad ka Meghalaya High Court Bar Association na ka bynta ki bar association baroh kiba don ha ka Jylla.
U ïathuh ba ïa ka rai ban boycott la shim ha ka sngi Nyngkong hadien ka jingïakhih ba nyngkong ha ka 27 tarik Nailar bad hadien ka jingïakynduh ïa u Lat ha ka Sngi Saitjaiñ, ka bym shym la don kano kano ka jubab na u Myntri Rang bad bad ka Tnad Aiñ.
Ka Association ha ka sngi Ba-ar kala ïakynduh ïa ka Chief Justice jong ka Meghalaya High Court. Kat kum ka jingong u Bah Jyrwa, ka Chief Justice ka la maham ba ka jingpep ban wan pyndep ïa ki kam ka ïing Bishar ka dei kaba la mana hapoh ka hukum ka Supreme Court, hynrei ka la kular ruh ïa ka jingïatreilang.
“Ka Chief Justice ka ong ba ka rai ba ngi shim ban pep na ki kam ka ïing Bishar ka dei kaei kaei ka bym dei ban leh namar ka don ka hukum ka Supreme Court kaba khang ïa ngi….hynrei ngi ong ba ngim don lynti pat da kumwei namar wat hadien ki jingïalang ba kum kine, ym don mano mano ruh ba shah skhor ïa ki jingdawa jong ngi” ong u Bah Jyrwa.
“Kala ong ba na ka liang ka jong ka ruh kan sa pyrshang ban ïakren lane pynbeit ïa ka jingïakren hapdeng ka Sorkar bad ma ngi..ka ong leit bad pyrkhat biang ïa kane ka rai bad sa wan biang ha ka por 2 baje ban trei noh ïa ki kam” ka la bynrap.
Hadien kane, ka kynhun ka la ïakynduh ïa u Myntri ka tnad Aiñ u Bah Lahkmen Rymbui ha ka por janmiet. U Bah Jyrwa ula ong ba kane ka jingïalang kam long satia kaba hun.
“Ngi sngewthuh ba ka jingïakren bad u Myntri kam Aiñ kam long kaba sngewhun namar kam shym la poi shano shano ruh” ula ong haba kam ba u Myntri um don jingtip ba bniah ïa ka dorkhast bala aiti sha u Myntri Rangbah bad tip tang halor ka rai ban boycott.
“U Myntri u ong ba ïa kito ki jingthungkam ba wan na ka Tnad Aiñ, u lah ban khmih ïa ki dalade hynrei ïa ka jingdawa ban weng ïa u Amit Kumar ka dei kaba hap rai da ka Kynhun Myntri” ong u Bah Jyrwa.
Ula kdew ba ka jingpan u Myntri ïa ka rai ka pyni ba ïa ka dorkhas bala phah sha u Myntri Rangbah, ym pat shym la wanrah hapoh ka kynhun Myntri.
U ïathuh ba u Myntri u khlem ai satia ïa kano kano ka por ban shong bishar ïa kane ka jingthungkam lane ai ka jingkular ban weng ïa u AG.
“Hadien ba ngi mih na ka jingïalang, ngi sngew ba ngi hap ban pynïïaid shakhmat ïa kaei kaba la rai hynnin ka sngi ban nym leit mih sha ki ïing Bishar” ula ong haba bynrap ba ka boycott kan dang ïai bteng bad ka Steering Committee kan sa shong bishar ïa ka jinglong jingman ha ka 3 tarik Nailur.
Haba ban biang ïa ki jingkynnoh, u Bah Jyrwa ula ong “Ka jingdawa jong ngi ka long namar u Amit Kumar ula pyndonkam bakla ïa ka Ophis jong u da kaba thung ïa la ki jong ki briew ha ki mukotduma kiba don ha Meghalaya” bad kynnoh ïa ka jingpynsyrwa kai ïa ka pisa u paidbah da kaba aikam ïa ki briew ba nabar.
Ula ong ba ka jingïakhih kala sdang hadien ba u AG ula ñiewpoh ïa ki bar Association da kaba kynthoh ba kim long satia kiba shngaiñ ïa ki kynthei, bad hadien la lap shuh shuh ïa kiba bun ki jingleh bym hok.
Halor ka jingsngap jar u Myntri Rangbah, u Bah Jyrwa ula ong “La i kumba u Myntri Rangbah u kwah ban khmih hi marwei ïa kane ka kam. Ka jingsngap jar u Myntri Rangbah ïa ka jingdawa jong ngi kaei kaba ngi sngew ka dei kaei kaei ka bym long satia kaba khuid”.
Ka Association ka pyntip ba ka dang ap ïa ka jingïakren bad u Myntri Rangbah ka Jylla.
