Bengaluru, Ïaïong 29: Ka Panjab University kala pynliem ïaka Jamia Milia Islamia da 85-84 ha ka jingïakhun final bad khur takma Ksiar ha ka Men’s Basketball ha ka Khelo India University Games kaba la long ha ka sngi Palei.
Ka jingïakhun final hapdeng kine ki ar tylli ki team ka Panjab University bad ka Jamia Milia Islamia University, New Delhi (JMI University) ka long kaba itynnad bad ïakhaid bha. Hadien ba kala lamkhmat ïa ka jingïakhun, ka Jamia kala rem noh ha ka Panjab kaba la lah ban wanphai da kaba khur point ha ka wat ïakhun kaba khatduh.
Hadien ba ka kynhun kala ïoh ban khur ïa ka takma Ksiar, na ka liang u kapten jong ka Panjab University u Guard Sahaij Sekhon u la ong, “Ngi dap da ka jingsngewkmen ban jop takma ksiar napdeng kiwei pat ki University kiba tbit kiba la ïashim bynta na kylleng jong ka ri. Kane kadei ka final kaba kyrpang, bad ka jingkhublei ka leit sha baroh kiba don ha ka kynhun bad ki coaching stadd namar ngi khlem la pyndem ha baroh ki jingïakhun. Ka Jamia (Milia Islamia) University kala ïalehkai bha ha kane ka final, hynrei ngi dap da ka jingsngewkmen ban pynliem ïa ka namar ka thong kaba hakhmat jong ngi ka long pynshisha ba ka team jong ngi kan dei kaba tbit tam napdeng ki University hapoh ka ri India, bad mynta ngi la pynurlong ïa ka.”
U Sahaij u la pynpaw ruh ba ka jinglah ban ïalehkai bha kadei ka jingai mynsiem na ki nongïalehkai donsap ha ka Khelo India University Games 2021. U la ong, “Shibun ki jinghikai ba ki nongïalehkai kila ïoh ha kane ka jingïakhun, bad wat u Veselin Matic uba dei u coach ka kynhun ïalehkai basketball ka ri India u la wan synrang lang na bynta ki nongïalehkai dang khie. Ng thikna ba u la ïohi hi da la ki jong ki khmat ïa ki katto katne ki player kiba la lah ban ïalehkai bha ha kane ka final.”
“Tang phra tylli ki University kiba rung sha kane ka lympung, bad baroh hi ki team kila long khlaiñ. Ha ka jingpynlong ïa kaba kum kane ka tournament, nga sngew ba ka Khelo India University Games kadei ka tournament kaba biang tam hapoh ri India. Ki don shibun ki jingïapher jong kane ka lympung ïalehkai bad ka All India University Games. Kum u nongïalehkai, nga sngew kumba ngi ïashim bynta ha ka jingïalehkai International namar kiei kiei kiba la pynlong ki long kiba biang nadong shadong na bynta ki player,” ong u Akshar Adhana kapten jong ka JMI University.
