Dawa ka FKJGP na ka sorkar jylla ban pynurlong noh ïa ka jingwan rah ïa ka ophis C&RD Block ha Mawhati

Nongpoh, Jylliew 14: Ban pynrurlong ïa ka jingangnud jong kiba bun ki paidbah nongshong shnong ba hap hapoh ka thaiñ Mawhati ha Ri Bhoi kiba la angnud ban don noh kawei ka ophis C&RD Block na ka bynta ban kyntiew ïa ka roi ka par ki paidbah ha katei ka thaiñ, ka Federation of Khasi Jaintia and Garo People (FKJGP), North Khasi Hills District ka la dawa biang ka sorkar ba ka dei ban wan rah noh ïa kane ka ophis sorkar kaba dei kawei na ka mat jingdawa ki paidbah kiba la sahteng la bun snem.
Haba kren sha ki lad pathai khubor, u General Secretary ka FKJGP, NKHD,, u Bah Shanlang Diengdoh, u la ong ba kane ka dei kawei na ka mat ba la sahteng bad kaba la lamkhmat da ka seng FKJGP ban dawa na ka sorkar halor ka jingdonkam ban don noh kawei ka ophis C&RD Block ha Mawhati, hynrei kumba long haduh mynta ka sorkar ka dang pynsahteng bad kam shym la lah ban pynurlong na ka bynta ka jingmyntoi jong ki paidbah hapoh katei ka thaiñ Mawhati.
U la ong ruh ka daw kaba la pynlong ïa ka seng ban khylli halor kane ka jingdonkam ban don noh katei ka ophis treikam, ka dei namar ba bun ki shnong ki la shem jingeh ban leit sha kiwei ki Block kum ha Bhoirymbong, Umsning, Umling bad la jin ba don ha Mawhati kane kan pynsuk ruh ïa ki nongïalam shnong bad ki kam pynroi ruh kin dang bun na ka bynta ban kyntiew ïa katei ka dong bad ka thaiñ ba dang sahdien ha ki kam pynroi.
“Wat ki synjuk nongïalam Shnong bapher bapher ruh ki la dep ban ïa dawa ne pynpaw ba la donkam ban don noh kata ka ophis C&RD Block bad kum ka seng ruh ka la shim ïa kane ka mat ban dawa na ka sorkar la kham bun snem mynta, hynrei kaba sngewsih haduh mynta ym shym la iohi kano kano ka dak ka shin ba ka sorkar kan wan rah ïa kane ka ophis sorkar kaba long ka jingmyntoi ïa ki paidbah katei ka thaiñ” ong u Bah Shanlang Diengdoh.
Namar kata, ban wan ka roi ka par bad ki jingkylla hapoh ki shnong ba hap ha ka thaiñ Mawhati, u Bah Shanlang Diengdoh kum u nongïalam ka FKJGP na Ri Bhoi, u la ong ba ka seng ka dawa na ka sorkar MDA 2.0 ba kan shim khia hakaba wan rah ïa kane ka ophis sorkar kiba pyntreikam halor ki kam pynroi bapher bapher sha u paidbah bad ha kajuh ka por ruh u la kyrpad ïa u MLA ka Mawhati, u Bah Charles Marngar ba un tied miej lem ha ïing Dorbar thaw aiñ ka jylla khnang ba kine ki jingangnud ki paidbah ban wan katei ka ophis sorkar kan urlong bad kan ai jingmyntoi ïa ki paidbah, u la bynrap.