Nongpoh, Jylliew 14: Kum shi bynta ban ïa snoh kti bad ka pyrthei hi baroh kawei ban rakhe ïa kata ka sngi kyrpang ba la tip kum ka World Blood Donors Day, ka Ri Bhoi District Cricket Association ka la rakhe ïa kane ka sngi da kaba leit ban ai snam Sha ka Blood Bank jong ka Civil Hospital Nongpoh.
Kane ka jingrakhe ïa kane ka sngi kaba kyrpang ka long shi bynta ban ïa snoh kti lang ha kane ka sngi bad ban pynshlur da kaba phah ïa ki nongïalam bad ki dkhot ka Association ba kin wan shakhmat ban ai snam na ka bynta ban pynim pat ïa kiwei ki mynsiem kiba donkam snam ha ka por ba pang ba shitom.
Haba leit ban ai snam sha ka Blood Bank jong ka Civil Hospital Nongpoh la ïalam da u President ka Ri Bhoi District Cricket Association, u Bah Rayonald Kharkamni bad u Secretary ka Association, u Bah Michael Kharhunai lem bad kiwei kiwei ki dkhot bad ki rangïalehkai Cricket jong kane ka Association.
Ha kane ka sngi da ka jingkylluid mynsiem kane ka seng, ki dkhot kiba la mih shakhmat ban ai snem ki la poi haduh 10 ngut ban ai snam ha katei ka Blood Bank ba la pynbit pynbiang da ki Doctor bad ki Nurse.
Haba kren ha kane ka sngi, u Bah Rayonald Kharkamni, kum u nongïalam ka Association u la ong ba kane ka jingmih ban ai snam ka long shi bynta ban leh burom ïa kane ka sngi bad kumjuh ruh ban pynshlur ïa kiwei ba kin mih shakhmat ban ai snam na ka bynta ban pynim ïa kiwei ki mynsiem kiba donkam snam ha ka por ba pang ba shitom.
Shuh shuh, u la ong ruh ba kum ka Association ka la ju pynlong ban ai snam man ka por sha kane ka Blood Bank bad ha kajuh ka por ruh u khot u wer ïa kiwei ruh kiba don mynsiem khnang ba ka jingmih jongki ban ai snam lah ban pynim ïa kiba bun ki mynsiem kiba donkam snam ha ka por ba ki pang ki shitom, u la bynrap.
