Twa ka ïing skul, ka ïing briew bad shah rong ka jingkieng subway ha Mawpud bad ha Kensohsan

Mawkyrwat, Jylliew, 14: Na ka daw jong ka jingjur palat u slap ha ka miet jong ka 13 tarik u Jylliew, 2023 ka la wanrah ka jingsynjor jong ka khyndew bad da kata ka la wanrah ka jingjulor kawei ka ïing Skul jong ka Khlur Rit Government Lower Primary School, Mawpud kaba hap hapoh ka South West Khasi Hills District sa shisien pat ka la mad biang ïa ka jingshah pynjulor ha ka mariang.
Yn tang kata ha kane ka jingjia ka ïing shet ja jong ka kong Jopcy Wanniang baroh kawei ka la twa bad hap ha katei ka skul haduh ba ka kynroh skul bad ki tin ïing skul ki la pra.
Katkum ki jingïoh lum khubor na ki nongshong shnong, la ïathuh ba katei ka jingjia ka la jia ha ka shiteng jong ka miet 14 tarik mynta u bnai ha ki por kumba 1:30 AM ei ei.
La ïathuh ruh ba kane ka dei ka sien ba-ar ba kane ka skul ka la mad ïa ka jingshah pynjot ha ka mariang, bad kaba nyngkong ka jia ha u snem 2019 ha kaba ka kynroh ïing jong katei ka kong Jopcy hi ka la twa bad pynjot ïa katei ka skul. La ong ba ki bor pynïaid skul ki la dep pyntip ha ka ophis BDO, BADO bad kumjuh ruh u MLA, bah Pius Marweiñ.
Ha kawei pat ka jingjia hynnin hi ka miet ha shnong Mawpud ha ka por kumba 1 baje ei ei mynmiet, ka la don ka jingshah tap khyndew ïa ïing jong ka kong Bala Ryntathiang namar ka jingjur palat jong u slap bad ha kane ka jingjia donbok ka kmie u kpa bad ka khun ki la lait im bad ym shym la don ba mynsaw.
Ha kane ka jingwan jong u slap uba jur, nalor ki jingjulor ki ïing ki sem ka la don ruh ka jingshah rong noh ha ka umsaw ïa kawei ka surok subway kaba don ha ka shnong Kensohsan kaba hap hapoh ka Ranikor C&RD Block kaba long ka lynti ban leit sha Nongjri ka la dkut noh hadien ba la shah rong ha ka um slap bad kane ka jingkieng shipor (subway) ka dei ba la shna da kawei ka Kompani ïa ka National Highway ba ki nang pyntrei mynta ïa kane ka surok kumba long mynta ki kali kiba dei ban ïaid lyngba kane ka surok ki la sahkut lut.