Nongpoh, Jylliew 12 : Ki Nongïalam ka Seng Hynñiewtrep Achik National Movement (HANM) Ri Bhoi District mynta ka sngi ka la leit syndon ban ujor da ka jingtoh sha u District Transport Officer ka Ri Bhoi ban kyrpad ban leh ei ei halor ka jingkynnoh ba ki don ki riew shim kabu kiba shim kabu na ki paidbah tang na ka bynta ban pynioh ïa ka Lisen kali bad kiwei kiwei ki kot ki sla kiba ïa dei bad ki kam kali.
Haba leit ban ïa kynduh ïa u District Transport Officer ka Ri Bhoi mytna ka sngi la ïalam da u President ka HANM, Ri Bhoi, u bah Ajit Makri ryngkat ka jingdon lang kiwei ki dkhot ka seng na kane ka District.
Kumba la pynpaw da ki Nongïalam ka HANM, Ri Bhoi, ka daw kaba la pynlong ïa ki ban leit ujor bad ban ai syndon da ka jingthoh sha u District Transport Officer ka Ri Bhoi, ka dei halor ka nongrim ba kum ki nongïalam ka seng ki la ioh pdiang shibun ki jingujor na ki paidbah ba ki don kita ki riew shim kabu ban oh dor ban shim pisa tang na ka bynta ban pynioh ïa ka Lisen Kali.
Ki la pynpaw ruh tang ban ioh ïa kawei ka Lisen Kali kitei ki riew shim kabu la kynnoh ba ki oh dor haduh 5000 haduh 6000 kawei ka Lisen na ki paidbah bad nalor ba ki shim kabu ha kiwei kiwei ki kam kiba ïa dei bad ki kot ki sla kali ba ki trai kali ki hap ban pynbiang kumba la buh kyndon da ka sorkar.
Namar kata, ki la ong ba ha ka jingïakynduh ïa u District Transport Officer ka Ri Bhoi, nalor ba ki la ai da ka jingthoh ban ujor halor ka jingdon kita ki riew shim kabu bad ki la kyrpad ruh ïa utei u ophisar ba un leh ei ei ïa kitei ki riew shim kabu khnang ba kan nym shah ktah ïa ki paidbah babun balang kiba leit ha katei ka ophis treikam na ka bynta ki kam bapher bapher kiba ïa dei bad ki kam kali, la pynpaw ki nongïalam ka HANM, Ri Bhoi.
