Shillong, Jylliew 05 : U Myntri sorkar ka jylla, Bah Paul Lyngdoh ha ka sngi Nyngkong u la ong ba ki paid Garo ki la kham shemphang bun shah ha ka rukom jied ïa ki nongmihkhmat lada nujor bad ki Khasi.
“Ha ka saiñpyrthei ngi dang long khunlung palat ka bor sngewthuh. Ki paralok jongngi na Garo Hills ka paw ba ki kham shemphang bha ïa ka politik,” u la ong haba kren bad ki lad pathai khubor ha iing sah jong u.
Katei ka jingkren jong u, kadei hadien ka jingkhluit ka ishu halor ka Reservation kaba la poi ruh haduh u pud ba naduh ki seng sainpyrthei, ki seng bapher bapher na rilum Khasi bad Jaintia ki la dawa ban bishar bniah biang ïa ka Resservation Policy.
Shwa kane, u Bah Paul u la ong ba hangne ha shwa ka elekshon ki pyrta ba ki la kwah Myntri Rangbah da u Khasi hynrei na Garo Hills kam mih satia kum katei ka sur na rilum Khasi ba ki dang kwah Myntri Rangbah na rilum Garo. “Hynrei ki leh kumno ki jubab ha ka elekshon ha kaba na ki 24 seat ha Garo Hills haduh 18 seat ki pynjop ïa ka NPP,” u la ong.
Shuh shuh u la ong ruh ba kane ka jinghylla kwah Myntri Rangbah na rilum Khasi ka pyntylli ïa ki shi jaka kawei ka party.
U ong ruh ba katei ka jinghyla ka pynlong ïa kiwei ruh ki kynhun bapher bapher mynta ba kin sdang lang ban dawa ïa ka bhah bad kumta kane ka la nang pynkyllain shuh shuh ïa ka ishu. Haba pynshai pat halor ka jingshah kynthoh halor ka jingsngap jar jong u kum uwei na ki nongïalam ba hakhmat na ki Khasi bna kren ei ei halor ka ishu Reservation, u Bah Paul u la ong ba kum ki nongmihkhmat kkam long satia ban shu pynpaw pyrthei lut ne ïathuh paidbah lut ïa ka jingtreikam ne ka buit treikam jong ki ban pyndep ïa ki kam kum ki nongïalam. “Katba ki wei ki nang kren nga pyndep ïa ka kam,” u la ong.
Shwa kane, u Bah Paul u la pynpaw ruh ïa ka jingsngewdiaw da kaba ong ba kiwei ki pyndonkam da ka jabieng hynrei ka Jaidbynriew ka pyndonkam da ka dohnud bad ka jingsngew.
Lah ban kdew hangne, ba katei ka jingkren jong u, ka long ban pynphai nia halor ka jingshah kynthoh kaba bun pyrshah ïa u khamtam haba ïadei bad ka jingsngap jar jong u haba ïadei bad ka jingshah thngan jong u nongïalam ka VPP, Bah Ardent Miller Basaïawmoit halor ka ishu Reservation Policy haduh 10 sngi.
