Leit peit ka Estimate Committee jong ka Iing Dorbar Thawaiñ ia ka skul bad jaka sumar sorkar ha Delhi

Shillong, Jylliew 05 : Ka Estimate Committee jong ka Iing Dorbar Thawaiñ ka jylla hynne ka sngi ki la leit jngoh ïa kawei ka skul Sorkar kaba don ha New Delhi bad ruh ïa ka Mohalla Clinic jong ka Sorkar Delhi ban ïohi da la ki jong ki khmat ïa ka rukom pynïaid ïa kine ki jaka ha kane ka Nongbah jong ka Ri.
Ki Dkhot jong kane ka Committee ki kynthhup ïa u MLA ka Nongpoh uba dei u Chairman ka Committee Bah Mayralborn Syiem, Bah Charles Marngar, u Remingtone G Momin, Limison Sangma bad ka Mianmi D Shira kum ki dkhot.
Kine ki Dkhot ka Committee ki la leit jngoh ïa kawei na ki skul sorkar kaba la tip ka Rajkiya Pratibha Vikas Vidyalaya kaba don ha Nai Basti, Kishan Ganj, New Delhi. Ka jingleit jngoh ïa kane ka skul ka long ban sakhi da la ki jong ki khmat ïa ka rukom pynïaid ïa ki skul sorkar ha nongbah Delhi.
Katkum ka kyrwoh la ong ba ha kane ka jingleit jurip, ka komiti ka la lap ba ki skul sorkar ha Delhi ki long kiba la bit la biang bha namar ki don naduh ki Digital Classroom, ki CCTV, ki Laptop, ki Library bad ki School Health Clinic haduh 20 tylli.
Ha kajuh ka sngi, ka Estimate Committee ka la ïoh ruh ban leit jngoh ruh ïa ka Mohalla Clinic jong ka Sorkar Delhi kaba la dep ban buh haduh 521 tylli ki Mohalla Clinic.
Kine ki Clinic pat ki dei na ka bynta ki paidbah nongshong shnong bad ki long ïing kiba duk, khlem siew dor eiei bad ha kine ki clinic ki ai ei ïa ki dawai, ki test snam, ultra sound, x-ray bad kiwei kiwei, bad na ka bynta ki jingshitom kiba kham eh, ki Doktor na kine ki Mohalla Clinic ki phah ïa ki sha ki Hospital.