Pan ki Scheduled Caste na u CM ïa ka bhah ba 5 % naka Reservation Policy ka Jylla

0

Shillong, Jylliew 05: Ka South West Garo Hills Scheduled Caste Welfare Association (SWGHSCWA) ka la kyntu ïa u Myntri Rangbah ka jylla u Conrad Sangma ban ai bhah 5% na ka bynta ki Scheduled Caste kiba don hapoh ka jylla.
Katkum ka dorkhas kaba la phah sha u Myntri Rangbah, ka SWGHSCWA ka la ong “Watla ka Meghalaya ka dei ka jylla kaba don ïaka Sixth Schedule kaba ïada ïa ki riewlum, hynrei donkam ruh ban kynmaw ba ki briew kiba dei ki Scheduled Caste kiba la duh lad bad ki Reserved Category katkum ka Constitution jong ka ri bad khlem da don ïa kano kano ka jingbhah na ka bynta ki Scheduled Caste, ka jingpyntreikam ïaka Roster System Reservation kan ym long kaba pura. Kumta dei ban bhah 5% na ka bynta ki Scheduled Caste kiba dei ki nongshong shnong ba pura ka Meghalaya bad kane ka dei kaba donkam kyrkieh ban ïada ïa ki Scheduled Caste kiba duna ha ka kamai kajih”.
Ha kaba ïadei bad ka jinglong jingman jongka Roster System bad Reservation Policy, ka SWGHSCWA ba katkum ka riti synshar ka ri ka la don ka kyndon haka Article 15 (4) bad 26(4) kaba dei ka hok ha ka ban bhah ha ka liang ka pule puthi, ïohkam ïohjam ne kano kano ka jingleh ka ban dei lang naka bynta ki Scheduled Caste bad Scheduled Tribe bad yn ym don mano mano ruh kiba lah ban pynkylla ïa kane.
“Ha Meghalaya ka jingdon jong ki Scheduled Caste ka long kumba 25,000 kaba long tang 0.58% na ka jingdon paid ha ka jylla, namar ka Reservation Policy jong ka Meghalaya, ki briew kiba dei ki Scheduled Caste ki la shah ktah jur ha ka jylla. Katkum ka Meghalaya Reservation Policy kam shym la don kano kano ka jingbhah na ka bynta ki briew kiba dei ki Scheduled Caste. Mynshwa la ai 5% ka Reservation ïa ki Hajong, Koch, Rabha, Bodo bad Scheduled Caste ( naka bynta 5 tylli ki jaidbynriew), hynrei hadien ba la pynrung ïa ka Maan tribe kum ka Scheduled Tribe, haduh 6 tylli ki jaidbynriew ki ïoh ïa ka 5% ka Reservation kaba long ka bym ïahap satia bad ka long pyrshah ïa ka riti synshar ka ri” kila pynpaw.
Kila pynapw ba kiwei pat ki jaidbynriew riewlum la ithuh ïa ki kum ki riewlum katkum ka Meghalaya Reservation Policy katba ki jaidbynriew Scheduled Caste kiba sah ha West, East, South bad South West Garo Hills la kheiñ ba ki dei ki bym dei ki riewlum.
“Ka long ka bym don jingmut bad kaba pyrshah ïa ka riti synshar ka ri ba ki Scheduled Tribe (OT) bad ki Scheduled Caste la kynthup lang ha kajuh ka jingbhah” la pynpaw ka SWGHSCWA.
Ka SWGHSCWA ka la pynpaw ruh ba hapoh Meghalaya ha ka por ba jied ban leit pule MBBS Nursing ym shim la jied wat tang iwei i dkhot na ka Scheduled Caste bad kumjuh ruh ha ka District Selection Committee, West Garo Hills, Tura na ki 17 ngut ki Surveillance Workers ym shim la jied satia tang iwei ruh na ka Scheduled Caste ne General Category bad wat ha ka State Level ïa ka Unreserved Posts la bat beit da kawei ka jaidbynriew riewlum ha ka jylla Meghalaya.
“Kumta ha baroh ka jingjied 100% ka Reservation la ïoh tang da ki Scheduled Tribes bad kane kadei ka jingpynkheiñ kaba shyrkhei ïa ka Roster Reservation Policy” la pynkut ka SWGHSCWA.

Leave A Reply

Your email address will not be published.