Shillong, Jylliew 05: Wat hapdeng ka jingpyrkhat kiba bun ba ka Seng VPP kaba la pynkhih ban pynbha ïa ka Reservation Policy kan long ka Party kaba isih tam ha Garo Hills, pynban la don katto katne ki Samla kiba la pynpaw ha Social Media da kaba ong ba lada don ka VPP ha Garo Hills kan nym don satia ka jingbamsap.
Kane kadei kaba la pynpaw da kawei ka Samla kaba la ai kyrteng ka Tengrimchi Sangma, kaba la pynmih ïa ka Post jong ka ha ka Group “The All Garo Hills Times Now (Republic Report)”, ka la pynmih ha ka ktien Garo kumne, “Garo Hills oba VPP Party napode blongen Corruption dongjawachim”. “We want VPP in Garo Hills”. (Lada don ka VPP ha Garo Hills ki kam bamsap kin nym don satia). (Ngi kwah ïa ka VPP ha Garo Hills)
Ïa kane ka post ha Facebook la don ki Samla na Garo Hills kiba kyrshan bad pynpaw ba ki kwah ba ka VPP ruh kadei ban wan ban thaw tnad sha katei ka thaiñ, kaba ha elekshon baladep la jop bun da ka Seng NPP, kaba la jop 19 Seat na ki 24 tylli ki Constituency MLA.
Lah ban kdew hangne ba wat lada bun ki la sngewtieng ïa ka jingpynkhih ka VPP ïa ka Reservation Policy ka lah ban wanrah ka jingïakynad hapdeng ki Khasi bad ki Garo. Hynrei na ka liang ka Seng VPP,ka la kren shai naduh kaba sdang ba kane ka jingïakhih kam don jingthmu satia ban knieh ïa ka hok jong ki paidbah Garo Hills lane ba ka jingïakhih kadei pyrshah ïa ki, hynrei ka dei beit ka jingïakhih ban dawa pynbha ïa ka Reservation Policy, namar ka jingshah ktah ki Samla jong ka thaiñ Rilum Khasi Jaiñtia.
