Ka VPP ym tang ba ki leh politik ïa ka RP hynrei ki wanrah ruh ïa ka jingsngewpher jaidbynriew, ther u Bah Paul Lyngdoh

Shillong, Jylliew 05: U Working President ka United Democratic Party (UDP) uba dei ruh u Myntri ha ka sorkar MDA u Bah Paul Lyngdoh ha ka sngi Nyngkong u la kynnoh ba ka VPP ym tang ba ka pyrshang ban leh saiñ pyrthei ïa ka mat jong ka Reservation Policy hynrei ka pyrshang ruh ban wanrah ïa ka mynsiem sngewpher jaidbynriew hapdeng ki Khasi bad Garo bad ka pyrshang ruh ban bet ïa u symbai ka jingïashun hapdeng kine ki ar jaidbynriew.
Ha ka jingïakren sha ki lad pathai khubor u Bah Paul u la ong ba ka lynti ba u President ka VPP uba dei ruh u MLA na Nongkrem u la shim ka dei ka lynti kaba kum ki nongthaw aiñ ka long kaba bakla shibun eh.
“Haba u paidbah u la pynkhamti ïa ka iktiar kum u nongmihkhmat kam dei ka lynti kaba dei ban pynmih ïa ki paidbah ban mih surok hynrei ban pyndonkam hok ïa ka iktiar ban ïasaid ha ka jaka kaba dei bad nga kum u nongmih khmat na Mawprem bad u Myntri ha ka sorkar nga la leh hok ïa kane bad ngam donkam ban put turoi aiu nga la leh,” u la ong.
“Nga ioh ba ïa kane ka Reservation la pynkhih pynban da ki paidbah ba die waidong, da ki nongdie madan. da ki nongñiah kali hato ki tip mo kaei ka Reservation bad nga iohi ba ki kham batai pynban ma ki bad ïa nga u ba la jied da u paidbah bad nga kwah ban kren shai ba kane kam dei ka drama ba ka VPP ka lah ban leh katba mon hynrei ka dei ka kam synshar khadar,” u la bynrap.
U la ong ruh ba ka jingpynmih ïa u paidbah sha surok ban ïakhih ïa kane ka mat ka dei kaei kaei kaba na ka liang jong u um mynjur satia.
“Ki sia ba la tah ha ka kti kiba thep vote khuid ruh kam pat khuid balei ban da pynmih surok ïa u paidbah lada pynmih ïa u paidbah kumto kan myntoi aiu ka jingjied nongmihkhmat,” u la bynrap.
U la ong ruh ba ka pyrthei baroh kawei ka la jam shakhmat ban kren sha ki jingstad ka juk mynta kum ïa ki Artificial intelligence (AI) ‘kiba kam nongïalam ïa lade ki pynshlur pynban ïa ki samla ban kthong tang ïa ki kam peon ha secretariat,’ u la ong.
“Ha ka jingshisha ngi dei ban kylli ïa balei ba na Meghalaya kam lah ban pynmih wat tang uwei ruh u trai muluk ha ka eksamin UPSC ban shim ïa ka kyrdan synshar ba heh kum ki ophisar hynrei ngi pat ngi ïakren pat tang ha i kam peon,” u la bynrap.
U Bah Paul u la ong ruh ba ha ka jingshisha ka jingeh kaba ka jylla ka mad ka dei ka jingkyrduhkam, ‘lada pynkylla ïa ka Reservation Policy kan ym pynmyntoi eiei ruh ïa kiba bun namar tang katno ngut eh ba ki kam sorkar kin lah ban ai kam namar ha ka shisnem ki kam sorkar kiba lait kin ym palat ïa ka 500 tylli katba kiba wad kam pat ki poi da ki lak ngut,’ u la ong.
Haba kynthoh halor ka jingwanrah placard ki katto katne ki nongshong shnong ka Mawprem hakhamt ka iingsah jong u, u Bah Paul u la ong ba ka long kaei kaei kaba phylla ban iohi ha ki video ba da ki driver taxi pynban kiba dawa pynkylla ïa ka Reservation Policy, ‘lada pynkylla ruh kin ym myntoi eiei wat lada ai bhah ïa ki Khasi da 70% ruh kin ym ioh kam sorkar shuh hi kin kut ha ka kam ñiah taxi,’ u la ong.
“Nga lyngngoh ruh ba kumno u kyrtong jong uta u Prah uba wan basaw ha ka elekshon u nud ban ïakhih ha ka jingshisha u la dei ban pdiang ïa ka rai ki nong Mawprem ban jied ïa u Bah Paul kum u MLA uto u kyrtong Prah lei u poi shaduh ka kyrdan kaba saw,” u la ong.
U la ong ruh ba ka VPP ka jop tang 4 seat hynrei ki pyrshang pynban ban hukum ha ka iing ba 60 ngut ki dkhot.
U la ong ruh ba ka VPP ka pyrshang ban pynbiej ïa u paidbah ha kaba ïadei bad kane ka mat.
Shuh shuh u la ong ruh ba ka VPP ka dei ban ïasyllok shuwa bad ki lawyer ba tbit ha ka constitution ban ïarap pynshai ïa ki ha kaba ïadei bad ki article bad ki kyndon ba don ha ka Constitution haba ïadei bad ka jingdawa jong ki.
Haba ïadei bad ka rai ka sorkar bad thung ïa ka Expert Committee ban peit ïa ka jingdonkam ban review ïa ka Reservation Policy u Bah Paul u la ong, “Nga ai khublei ïa ka Khasi Students’ Union (KSU) kaba la ai jingmut ban don ka Expert Committee na bynta ba review ïa ka reservation policy ha kaba ka sorkar ruh ka la sngap ïa kane ka jingai jingmut ka KSU.
Haba kylli la u kyrshan ne em ïa ka jingdawa pynkylla ïa ka Reservation Policy u Bah Paul u la ong, “Ngi kum ka party ruh ngi buh ïa kane ka mat ha ka jutang elekshon bad ngim leh shongshit ïa kane bad nga iohi ba kane ka kam kam dei satia ka mat kaba donkam eh ban leh kyrkieh kyrkieh namar don bun bah ki kam kiba ktah shisha shisha ïa ka jylla”.