Kino kino ki skul kim donkam siew pisa sha ki ophisar haba wan ki kam ai jingmyntoi sha ki skul pule: DSEO Ri Bhoi

0

Nongpoh, Jylliew 05: Khnang ban nym don kino kino kiba shim kabu halor ki jingmyntoi ba dei ban ioh ki skul pule bapher bapher ha ka District, ka District School Education Officer ka Ri Bhoi, ka Kong P. Lyngdoh Nonglait mynta ka sngi ka la pynshai paidbah ba kum ki bor pynïaid skul jong kino kino ki skul kim donkam ban siew pisa lada wan kino kino ki jingai jingmyntoi na ka bynta ki skul.
Haba ïa kren bad ki Lad pathai khubor, ka District School Education officer ka Ri Bhoi, ka Kong P Lyngdoh Nonglait ka la pynshai paidbah bad khamtam na ka bynta ki bor pynïaid skul hapoh ka District ba kim dei ban siew pisa satia kum ha kaba pan jingbit ban plie skul, ban don ka jingithuh ïa kino kino ki skul (regularization) bad ruh kiwei kiwei ki kam ba ai jingmyntoi ka sorkar ïa ki skul na ka bynta ban kyntiew ïa ka pule ka puthi.
Kum ka District School Education Officer, ka Kong Lyngdoh Nonglait ka la ong na ka bynta ban ai jingbit ban plie ïa kino kino ki skul pule, ban ioh ïa ka jingithuh ïa ki skul da ka sorkar lyngba ka tnad pule puthi bad kiwei kiwei ki kam ai jingmyntoi ka dei ka kamram jong ki ophisar ban pyndep kumba la bynshet da ka sorkar bad kum ki bor pynïaid skul hapoh ka District kim da donkam ban siew pisa ïa ki ophisar na ka bynta kitei ki jingmyntoi ba wan sha ki skul.
Ka la pynshai ruh haba ki skul ki thmu ban pan jingbit naduh ki jingplie thymmai ïa ki skul, ban ioh ïa ka jingithuh ïa ki skul lane kino ki ki kam ba ai jingmyntoi ka sorkar la ka long ha ki SSA School bad kiwei kiwei ki kam ba ai jingmyntoi na ka bynta ki skul, kum ki bor pynïaid skul kim donkam ban siew pisa bad shisien ba la biang ki kot ki sla kum ki ophisar ki hap ban pyndep ïa la ka kamram kumba la bynset da ka sorkar ban pyndep ïa ki kam na ka bynta ka jingbit jingbiang jong ki skul ban kyntiew ïa ka pule ka puthi.
Shuh shuh, ka la pynshai ruh ba lada don kino kino kiba pan pisa na ka liang ki ophisar ka tnad pule puthi ki lah ban pyntip sha ka ophis jongka khang ban ioh ban leh katkum ki kyndon lane ban pynshitom ïa ki. Lada donkam ban shim kum ki Bharat Scouts and Guides, Teachers Welfare Fund, ka tnad pule ka ai ïa ki rusit (receipt), bad lain a kine ym donkam ei ei ban dawa pisa ne siew pisa ban shim na ki skul halor kino kino ki kam ai jingmyntoi sha ki skul ban kyntiew ïa ka pule ka puthi, ka la bynrap.

Leave A Reply

Your email address will not be published.