Nongpoh, Jymmang 21: Hadien ka jingpynthikna na u District AH & Vety Officer, Ri-Bhoi District, u District Magistrate ka Ri-Bhoi u la pynjari syndon da ka jingkhang dam (Containment Zone) haki 4 tylli ki shnong ha Ri-Bhoi ba kynthup ïa ka shnong Mawlein Mawkhan, Mawtneng bad Umwang Them naduh ka 1 tarik Jylliew tad haduh ban da pynbna da kumwei namar ka jingjur jong ka jingpang African Swine Fever (ASF).
Naka liang ki bor distrik kila shim ruh ïaka rai ban khang dam ïa kitei ki shnong khnang ba ki Doctor naka tnad Veterinary kin lah ban wad bñiah ban lap ïa ki sñiang ba don jingpang ha kitei ki shnong, bad naka liang u District Magistrate u la mana ruh ïaki paidbah ba kim dei ban thied sñiang ban ot doh bad ban die doh sñiang ha kitei ki shnong, bad baroh ki nongri sñiang ki dei ban lehkhuid bad kim dei ban shah ïano ïano ban rung sha ki jaka ri sñiang jong ki khnang ba katei ka jingpang kan nym saphriang.
