Shim byntalang ki Nepali bad ki Khasi lem bad kiwei ki jaid bynriew ha ka jingïaseng ïalap ha Umru

Nongpoh, Ïaiong 26: Hadien ba la wan biang ka shongsuk shongsain ha ka Block II ba hap ha ka Raid Nongtung ha Ri Bhoi District, kumba ha kine ki sngi la mih ki kynrum ki kynram na ka jingjia ha ka Shnong Umlaper ba la hap ban tehpyrkhing ïa ka leit ka wan ki paidbah, hynrei ka long kaei kaei ka khubor kaba sngewtynad ban tip ba ki jaid bynriew Khasi bad ki Nepali ba la long Khristan ki la lah ban pynlong sa da ka jingïaseng ïalap ha Umru shi bynta ban wan rah ïa ka shongsuk shongsain ki paidbah ha kitei ki shnong khappupd.
Haba kren halor kane ka bynta, kane ka jingshim bynta lang naduh ki Nepali ba la long Khristan bad ki Khasi lem bad kiwei ki jaid bynriew ha katei ka jingïaseng ïalap ka long ka khubor kaba ki angnud ban wan rah ka ka shongsuk shongsain ki paidbah ha kitei ki shnong khappud.
Ïa kane ka jingïaseng ïalap la pynlong ha ka Shnong Umru lyngba ka Balang Presbyterian Umru ha ka jingpeit jingkhmih ka Balang Kmie Presbyterian Tyrso. Ïa kane ka jingïaseng ïalap la pynlong ruh ha ka 24 tarik mynta u bnai Ïaiong 2022 ha Umru bad ka long ka khubor kaba bha tam ba la wan ban shim bynta naduh ki Khasi, ki Nepalai bad kiwei ki jaid bynriew ba la long Khristan hapoh ka Balang Presbyterian.
Ki nongkren ha kane ka jingïaseng ïalap ban pynsaphriang ïa ka Ktien ka Jong u Blei ki kynthup ïa Rev Biju Rai na Lad Rymbai bad la pynkylla Khasi da u Bah Bius Lyngdoh ban pynsngewthuh sha ki paid Khristan halor ka jingkren jong utei u Pastor uba dei na ka jaid Bynriew Nepali.
Kane ka jingïaseng ïalap ka la long kaba jop bad kaba angnud ban wan rah ïa ka shongsuk shongsain ki paidbah ha kitei ki shnong khappud ka dei da ka jingdon alng ki 2 ngut ki Missionary ba kynthup ïa u Bah Nesstar Mawlong, u Jibon Bhujel na ka jaid bynriew Nepali, bad la don ryngkat ruh u Tbn. D. Masynting, bad rngut na ka DCB u Bah Pialshon Shadap bad u Bah Bius Lyngdoh.