Nongpoh, Ïaiong 24: Da ka mynsiem jong ka jingkyrmen ba ai ka jingshakri na ka bynta ka eh ka shon ki paidbah bad ban wan rah ka jingkylla hapoh ka shnong ka thaw, ki khun samla jong ka Shnong Nongmawlong da ki phew ngut ha ka sngi Saitjain ki la wan ban pynïasoh ïa lade sha ka seng RBYF kaba dei kawei na ka seng kaba ju shakri na ka bynta ki paidbah ka them Ri Bhoi.
Kum ban pynpaw, ka seng RBYF ka dei kawei na ka seng kaba la paw bha ha RI Bhoi bad kaba la don ruh shibun ki tnad treikam hapoh ka District bad kane ka seng kat dang mih ki sngi ka la dang lah ban pynkha ïa ki tnad treikam da ka jingthmu ba ki samla kiba la pynïasoh sha ka RBYF ki dei ban long kita ki shipai ka seng ban trei na ka bynta ka eh ka shon bad ka bha ka miat jong ki paidbah ha ka them Ri Bhoi.
Kine ki samla ka shnong Nongmawlong ki la wan ban ïasoh ruh sha ka seng RBYF ka dei ha ka jingïalang kaba la long ha ka sngi Saitjaiñ ha ka shnong Nongmawlong ba la don ryngkat naduh u Political Secretary ka RBYF sengkmie, u Bah R.J. Thangkhiew, U President ka RBYF Umsning Circle, u Bah Devan Wajri, u President ka RBYF Kyrdemkulai Circle, u Bah Synshar Kharjanti lem bad kiwei kiwei ki nongïalam ka RBYF.
Ki samla kiba la wan ban pynïasoh sha ka RBYF bad kiba la shim ïa ka kyrdan nongïalam ka RBYF Nongmawlong Unit ki kynthup ïa u samla Headingroy Lyngdoh kum u President, u samla Bonny Lyngdoh kum u General Secretary, u samla Shinning Nongbet kum u Vice-president lem bad shibun kiwei pat ki nongïalam kane ka Unit.
La pynskhem ïa kine ki nongïalam da u Political Secretary ka RBYF, u Bah R.J Thangkhiew bad kum u nongïalam ka seng kmie u la ai ruh ki kyntien sneng ki kyntien khraw ïa kine ki samla ba kin shim shisha ïa ka lyngkor nongïalam ha ka shatri ka RBYF ban peit ïa ka eh ka shon ka shnong ka thaw bad ruh haba ki wan rung sha ka RBYF ki dei ruh ban don kata ka mynsiem ban ïada ïa la ki parado ki para snam ba ka RBYF ka dei ka seng kaba shakri na ka bynta ki paidbah ka them Ri Bhoi bad ha ka jylla hi baroh kawei.
