Hiar ka VPP ha Jowai ban pynsngew ïa ki jingeh ki khun samla wad kam na ka ‘Reservation Policy’ ba 50 snem mynta

Jowai, Ïaïong 19 : Ka Voice of the People Party (VPP) mynta ka sngi Balang kala hiar sha Jowai ban pynsngewthuh paidbah halor ka rukom bhah kam jong ka sorkar lyngba ka ‘Reservation Policy’ kaba long noh shilliang lada ïanujor hapdeng ki jaitbynriew Garo bad ki Khasi kaba la pyntreikam mynta la 50 snem.
Ïa kane ka jingïalang la pynlong ha Stand Ummulong, Iawmusiang Jowai ba la pynïaid da u Dr. Ricky J. Syngkon, ha kaba la pynsngew ba kane ka jingïalang paidbah ba la khot pynlong da ka VPP ka long shi bynta ban ai jingpynshai da kaba tikna sha ki paidbah ha kaba ïadei bad ka rukom pyntreikam ïa Roster System bad kumjuh ïa ka jingdkoh ha ka Policy bhah kam ka sorkar jylla kaba la wanrah ka jingduh nong bakhraw eh ïa ki khun samla kiba wad kam sorkar.
U President ka VPP bah Ardent Miller Basaiawmoit haka jingkren ula ong ba ka jingwan hiar jong ki mynta ka sngi ha Jowai ka long ba pynshai ba ka ‘Reservation Policy’ kaba la ktah shisha ïaki khun samla, ula ong ba ka VPP ka mih ha ka por ba eh bha da ka jingthmu ban wanrah ïa ka jingïatylli kum shi para bad ban kren kawei ka sur kum ka jaitbynriew.
“Ka long kaba ma lada ngi kren da ki ktien jar jar ka shnong namar kane ruh ka lah ban pynïapher ïa ka jaitbynriew, para ma ngi ngi dei ban kren da kawei ka ktien (Khasi) ban pynithuh ha ka pyrthei hi baroh kawei namar ka ktien ka long kaba teh song ïa ngi” ong bah Basaiawmoit.
Ha kaba ïadei bad ka jingeh kaba mih na ka Roster System, u ong na ka liang ka seng VPP kala ïoh ban pynsngew ïa kane hapoh ka ïing dorbar bad ka sorkar ruh kala sngap bad haduh mynta ki dang ap kaei ka jubab ka ban mih ha ki sngi ban wan, kum ka party ka dang ïaid shakhmat ban buddien ïa kane.
Ka sorkar mynta kala dei ban thaw ïa ka Expert Committee ka ban ïathir jingmut halor kane Reservation Policy, da kaba sangeh chwa ïa ka jingthung kam thungjam hapoh ka jylla haduh ban kan da biang shi syndon, ula kyntu ïa ki paid nongshong shnong ka Ri-Lum Jaiñtia ba kin kyndit noh ban jied ïa ki nongïalam kiba trei na ka bynta ka lawei ka jaitbynriew.
U bah Basaiawmoit ula ong ba kane ka party VPP kan ïeng ban pynduh pyndam ïa ka kam bamsap hapoh ka jylla bad kan nym ailad shuh ïa kane ka sorkar ba mynta ban kan ïoh bamsap ha kine ki san snem, ula buh jingkylli kumno kane ka sorkar mynta kala thung Chairman, Adviser da kito kiba rem MLA bad kane ka paw ba ki don jingmut ban bamsap bad kaba pyllut kai ïa ka pisa paidbah.
Ula pyntip ba dei lyngba kine ki jingeh baroh U Blei u sei ïa ka VPP ban ïoh ka jingshynshar paidbah kaba khuid ba suba, kum ka Party ka don tang 4 ngut ki MLA mynta hapoh ka ïing dorbar hynrei ki sngew pat kumba don 40 ngut ong ban Ardent.
Halor ka Reservation Policy na ka liang ka party kala dep ban ai jingthoh sha ka sorkar ban pynbeit noh ïa kane ka rukom thung kam thung jam, hynrei haduh mynta ym pat shem la ïoh jubab bad kane ka long tang ka jingsdang jong ka jingdawa da kaba pynlong ki jingïalang paidbah ha ki ar jaka bad lashai kan long sa ha Jaiaw, lada ka sorkar ka dang pynslem ym shim ïa ka rai ban pynlong jingïakhih da ka ïamih paidbah.
“Lada kini ki shiphew ngut ki Minister (Khasi) jong ka sorkar ki nud ban kren shaphang kane ka rukom thung kam kaba ktah ïa ki khun samla wat na ka liang u Conrad Sangma ruh um shem la nud ban pyntreikam ïa ka, hynrei dei ma ki kiba sngap jar na ka jingdon ka jadu ha ka shiki ba ki bat”, kynthoh u ma Ardent,
Ula ong ruh myn ha kane ka Election ba la dep la dei ban ïoh noh ïa ka sorkar jong ka seng riewlum hynrei ki don pat kiba shet kylla bad kiba la leit ban sdien bus ban ai jingkyrshan ïa ki Party National.
Shuh shuh ula ong kane ka bhah thung kam kaba la treikam la 50 snem mynta kam don bhah satia na ka bynta kiba duna dkhotmet, kiba wan na ki longïing ba duk, kumta la donkam ban pyrkhang bha ïa kane.
Ula ong ba ka VPP kala ïoh ïa ka jingithuh da ka Election Commission of India ba kala long ka State Party da kaba ula kular ba kan long ka seng riewlum kaba paka ym tang ban jop Election hynrei ban peit ïa ka eh ka shon jong ka Jaitbynriew.
Ula kynthoh halor ka jingtlod jong ka sorkar namar ka jingwan kyntur pud jong ka Assam sha poh ka jylla Meghalaya, kumta ka donkam ka jaitbynriew kaba bah bad kaba ïada ïa ka jong ka hok ban tuh ïa hok ngin ym ailad, da kaba u pynsngew ïa ki kyntien ‘ieit shwa ïa lade bad hadien ieit ïala u para marjan.
Ha kaba ïadei bad ka bha ka miat jong ki khun samla u ong kiba bum mynta ki ngop ha ki lynti ba sniew da ka dih ka bam namar ka jingkyrduh kam kyrduh jam, kumta haba ïakhun election dei ban hikai ïa ki khun samla ym da ka pisa ban thied kyiad, ula pynsngew ruh ba ka party ka don ka thong ban wanrah ïa ka mei mariang kaba khuid ba sumar da kaba khang lad ban nym pynjulor ïa ki khlaw ki btab.
Na ka liang ki paidbah hadien jong kane ka jingïalang kila leh ban ai khublei ïa u bah Bah Ardent Miller Basaiawmoit lem bad ki nongïalam jong kane ka seng kiba la poi sha kane ka jingïalang ha Jowai.