Pynsangeh shwa ïa ka thungkam katba ym pat dep pynbeit ïa ka Roster System: KHNAM
![](https://mawphor.com/wp-content/uploads/2022/07/mawphor-1.jpg)
Shillong, Ïaïong, 11: Ka Khun Hynñiewtrep National Awakening Movement (KHNAM) ka la dawa ïa ka Sorkar Meghalaya Democratic Alliance (MDA-II) ban pynsangeh shwa ïa ka jingpynbna rungkam tad haduh ban da pynbeit pura ïa ka Roster System.
“Ka jingkren jong u Symbud Myntri Rangbah halor ka Roster System kam paw kumba ka don jingkular. Ngi kwah ban pynpaw ba ka jingïathir sani halor ka Roster System tang hapoh ka jingïalang Kynhun Myntri kan ym weng ïa ka jingeh. Ki sienjam ba la shim da ka Sorkar ka long ban ïakren halor kane ka mat, ha ka jingïalang Kynhun Myntri, ha ka jingïalang jong ka MDA, ha ka jingïalang jong baroh ki seng saiñpyrthei bad kiwei kiwei kumba la pynpaw da u Symbud Myntri Rangbah ka pynpaw tang ban tuh ïa ka por katba ha kawei pat ka liang ka jingpynbna thungkam ha ki tnat treikam bapher bapher ka la nang ïaid stet ban shim kabu ïa ka Roster System be-aiñ kaba mynta khnang ba kan ïarap tang ïa kawei ka jaidbynriew,” ong u kyrwoh ba la phah da u Vice President ka KHNAM u Bah Thomas Passah.
“Dang khyndiat sngi, ngi la ïohi ba ki don bun tylli ki Advertisements ba la pynmih ha kaba ïadei bad ka jingpynbna thungkam ha ki tnat treikam bapher bapher jong ka Sorkar bad ki don ki khep ha kaba ïa ki post kiba lait la pynbna paidbah katkum ka bhah ba la pynmih lyngba ka Roster System, ha kaba bun tylli ki Seat la mang kham bun sha ki Garo bad duna sha ki jaidbynriew Khasi bad Jaiñtia,” la bynrap u kyrwoh.
“Namarkata, lada ka Sorkar ka sngewkhia, ngi dawa ba baroh ki jingthungkam dei ban pynsangeh shwa tad haduh ban da wanrah ïa ka Roster System ba shong aiñ,” ong shuh shuh u kyrwoh.