10 snem sah thylli 198 tylli ki post Professor bad 31 tylli ha ka Group-A ha skulbah NEHU

Shillong, Ïaïong, 11: Ki nongïalam jong ka Khasi Students Union, North Eastern Hill University ha ka sngi Baar ki la ïakynduh ïa u Vice Chancellor ka North Eastern Hill University u Prof. P. Shukla ban pan jingpynshai ha kaba ïadei bad ka jingsah thylli haduh 198 tylli ki post nonghikai naduh 10 snem mynshwa ïa kiba ym pat pyndap satia haduh mynta bad 31 tylli ki post ha ka Group-A kiba hap hapoh ka Non-Faculty.
Kane ka jingpynsngew ha u Vice Chancellor ka long hadien ba ka seng ka la ïoh ïa ka jubab ba la pan jingpynshai na ka ophis u Registrar (incharge) ka NEHU u Prof. SK Dixit ha kaba ïadei bad ka jinglait thylli jong ki kam nonghikai bad nongtrei hapoh kane ka skulbah.
Katkum ka jubab na u Registrar (Incharge), la pyntip ba ki post ba sah thylli ha ka kam Professor ki long 67 tylli, Associate Professor-79 tylli, Assistant Professor-52 tylli. Katba ki Non-Faculty Post kiba hap hapoh ka Group-A ki don 31 tylli.
U President ka seng u samla Richest Malngiang ha ka jingïakren bad u nongthoh khubor u la ong, “ka jingbym pyndap jong ka skulbah NEHU ïa ki post ba thylli jong ki Professor, Associate Professor bad Assistant Professor ka la buh jingeh haduh katta katta ïa ki samla pule bad khamtam ïa ki 1200 ngut ki Research Scholar kiba pule ha kane ka skulbah.”
“Ka jingbym pyndap ïa ki Non-Faculty Post kiba hap hapoh ka Group-A ka la ban khia ïa ki Professor nalor ba ki hap ban hikai ki la shah tynrong ban peit shipor ïa ka kam Registar bad ha kiwei kiwei de ki kam. Kane ka la buh jingeh haduh katta katta,” ong u samla Malngiang.
U la ïathuh ba u Vice Chancellor u la kular sha KSU ha u bnai Jymmang mynta u snem un sa ïaleh katba lah ban pyndap noh ïa ki post ha ka Group-A kiba dang sah thylli da kaba pynbna mardor ïa ka Advertisement laitkam.
“Ngi khmihlynti ba um dei ban shu kular da ka ktien hynrei u dei ban leh ruh katkum ba u la kular,” ong une u nongïalam ka seng.
Haba kylli, u la ong, “ka jingshimpor ban pyndap ïa ki post kiba thylli ki dei na ka daw ba ki Vice Chancellor barim kim shym la khot ïa ka Advertisement bad kim shym la khot ruh ïa ka Selection Process. Dei na kane ka daw katba nang mih ki snem ka jingthylli ki post ka la nang bun,” bad bynrap, “kine ki 198 tylli ki post ki dei kiba don tang hapoh Shillong Campus bad ka jingduna nonghikai lei lei ha manla ki Department ka don beit.”
Une u nongïalam ka KSU NEHU Unit u la maham lada ki bor ba dei peit jong ka NEHU kim lah ban pynurlong ïa kaba la kular ka seng kam banse ban pynlong da ka jingïakhih.