Ban pynbeit thymmai ïa ka aiñ sam bynta lang ïa ki khun kynthei bad shynrang

Shillong, Ïaïong 11: Ka Maitshaphrang da ka jingïatreilang bad ka Federation of Khasi Jaiñtia and Garo Peoples (FKJGP), ka Khasi Students’ Union (KSU) lem bad ka Hynniewtrep National Youth Front (HNYF) ha ka sngi Ba-ar ka la khot bad wer ïa ki nongïalam jong ki kur bapher bapher ka rilum Khasi bad Jaiñtia ban ïashim bynta lang ha ka jingïalang ka ban sa long ha ka 15 tarik u Ïaïong, 2023 ha Jaiaw shyiap Lumpyllon cumminity Hall na ka bynta ban ïathir ïatai sani khnang ban dawa ïa ka sorkar jylla ban pynkylla ïa ka aiñ kaba aibhah lang ïa baroh ki khun khlem da kheiñ ne leh shiliang tang ïa ki khun kynthei khatduh.
Ha ka jingïakren bad ki lad pathai khubor u Convenor jong ka Maitshaphrang u Bah Michael Syiem u la ong ba ka jingdawa ïa ka sorkar ka long ban pynkylla ïa ka Meghalaya Succession to Self Acquired property (Khasi & Jaiñtia Special Provision) Act 1986 khnang ba ka aiñ ai bhah lang ïa ki khun shynrang bad ki kynthei ïa ka nongkhynraw bad ka nongtymmen ki kmie ki kpa.
“Ka nongkhynraw kaba hiar pateng sha ki khun ka kylla ka nongtymmen ba ki ïoh pateng bad bunsien kane ka nongtymmen kaba mih na ka nongkynraw ka kylla nongtymmen bad tang ki khun kynthei khatduh ba ïoh bhah bad dei na kane ka daw ngi dawa ban pynkylla ïa kane ka aiñ ba kane ka nongkhynraw ba kylla nongtymen ki khun kynthei bad shynrang kin ïoh bynta lem,” u la ong.
U la ong ba jingïakren ha kane ka jingïalang kan dei beit ïa ka nongtymmen ba ïoh na ka nongkynraw ki kmie ki kpa ym na ka nongtymmen ba dei trai da ka kur.
Shuh shuh u la ong ba ka Maitshaphrang ka wer ïa baroh ki nongïalam ki sengkur, ki riewpaidbah ban shim bynta ha kane ka jingïalang khnang ban ïatai ïa thir na bynta ban pynkhlaiñ ïa ka jaidbynriew lyngba ki longiing longsem.