Nongpoh, Ïaiong 20: U Bah Jason S Mawlong MLA ka Umsning mynta ka sngi u la leit ban plie paidbah ïaka kamra klas ba thymmai jong ka skul Mawtnum Presby terian Centenary Memorial Secondary School haka shnong Mawtnum kaba la tei haka jinglut kumba 3 lakh tyngka lyngba ka skhim SRWP ban dang pynheh bad pynïar ïaka jingshakri jong katei ka skul kaba la don mynta kumba 16 snem ka jingïaid lynti.
La sakhi ruh ha katei ka sngi ka jingplie ïa katei ka kamra klas da ka jingdonlang ki riew rangbah na katei ka shnong naduh u Tbn. RR Kynsai Makdoh, Dr. K Nongmalieh, Kong K Nongmalieh, ki nonghikai, ki khynnah skul lem bad ki longkmie longkpa na katei ka shnong.
Naka liang ki riew rangbah jong katei ka shnong bad ka Balang haba kren maitphang ha katei ka sngi kila pynpaw ba ïa katei ka skul la seng haka jingdap 100 snem jong ka Balang ha katei ka shnong ha ryngkat ka jingïatreilang bad ka Dorbar Shnong Mawtnum ban pyntyllun ïaka shalyntem jong ka jingnang jingstad bad khamtam ban lum ban lang ïaki khun samla ban ioh ïaka jingstad ba kin long pat ki khlur kiba tyngshaiñ haka thaiñ, watla ki mad shibun ki jingeh bad ki jingjynjar ha ka jingïaid lynti katei ka skul mynta kala nang roi bad nang kiew shaphrang kaba ju pynmih ruh ki khynnah kiba pass bah man u snem.
U Bah Jason S Mawlong kum u MLA haba kren ha katei ka sngi u la pynpaw ka jingsngewkmen kaba khraw hadien ba la lah ban plie paidbah ïa kawei ka kamra klas kaba thymmai katkum ka jingdonkam jong katei ka skul ban dang pyntyllun ïaka jingshakri ha katei ka thaiñ ban saiñdur ïaka lawei jong ki heprit kiba leit pule ha katei ka skul kaba la don mynta haduh ka klas X.
U ong ruh ba kam long kaba suk ban pynïaid ïaka skul bad sngewthuh shai bad ki bor pynïaid ki mad shibun ki jingeh bad jingjynjar haka jingïaid lynti ryngkat ka jingaimynsiem ba kum u nongmihkhmat un don ryngkat bad ki haki jingdon kam baroh bad kyntu ruh ïaki khynnah pule ha katei ka sngi ba kin long ki khynnah kiba tipsngi kiba nang ban burom ïaki nonghikai bad tieng ïaki kmie ki kpa ha ryngkat ka jingminot thop haka jingpule.
