Shillong, Ïaïong 20 : Ki rangïalehkai ka Meghalaya ki la pyni shisha ïa ka jingtbit jong ki haduh ba kin da lah ban pynïakhaid mar 2-2 kol ha ka jingïakhun pyrshah ïa ka kynhun ba khlaiñbor jong ka Kerala ha ka lympung jong ka Santosh Trophy kaba long ha ka janmiet sngi Balang ha Payyanad Stadium, Manjeri Kerala.
Ha ka jingïakhun kaba la noh shilliang bha ha ka kylla step, dei ka Kerala kaba la ïoh ban thep nyngkong lyngba u Saffnad ha ka minit kaba 17. Hynrei khyndiat minit shwa ka kylla step kata tang ha ka minit kaba 40, u Kynsaibor Lhuid u la ïoh ban pynphai noh ïa katei ka kol kaba pynlong ïa ka jingïakhun ban kut noh da ka jingïakhaid mar 1-1 kol.
Ka jingïakhun ha ka kylla miet ka la nang shongshit namar tang ha ka minit kaba 55 dei ka Meghalaya kaba ïoh ban lamkhmat kylla lyngba ka kol na u Figo. Hynrei hangne ruh tang ha ka minit kaba 58 ka Kerala ka la ïoh ban pynïakhaid noh lyngba u Saheef. Kumban shu kdew hangne, ka Meghalaya ka don mynta saw point hadien ba ka la ïoh ban pynliem da 3-2 kol ïa ka Rajasthan dang shen.Ka jingïakhun kaba bud ïa ka Meghalaya mynta kan dei pyrshah ïa ka West Bengal ha ka sngi Thohdieng ha ka por 4baje janmiet.
