Bym phai khmat ka sorkar, mih ka RBYF ban tih bad pynbha surok ha ka shnong Umtangar Patharkhmah

Nongpoh, Ïaiong 19: Namar ka jingbym phai khmat jong ka sorkar ha kawei naki shnong kyndong ka thaiñ Patharkhmah kaba la pynlong ïaki paidbah ban kynduh mawsiang bad shem jingeh haka leit ka wan, ka Ri-Bhoi Youth Federation, Umtangar Unit da ka mynsiem kaba khia mynta ka sngi kala mih shakhmat ban tih bad pynbha ïaka surok ha katei ka shnong naka bynta ban pynsuk ïaki paidbah haka leit ka wan.
Ha katei ka jingmih jong ki nongïalam ka RBYF ban shna bad tih surok la sakhi ruh da ka jingdonlang ki nongïalam shnong kiba la ai ka jingïaroh ïaka sienjam bala shim da ki nongïalam ka RBYF ha katei ka thaiñ namar ka jingiohi ïaka jingjynjar jong ki paidbah ha katei ka shnong khamtam ki khynnah skul kiba leit sha ki jaka pule man ka sngi.
Naka liang ki nongïalam ka RBYF Umtangar Unit kila pynpaw ruh ka jing sngewkhia kaba jur halor ka jingbym phai khmat jong ka sorkar ïaka jingeh jong ki paidbah kiba shem jingeh wat tang ka lynti ban ïaid namar ka khohruh khohram bad dei namar ka jingud jong ki paidbah naka liang ka seng hapoh ka jingïalam jong u Samla Evening Shadap President bad u Arun Hujon kila shim ïaka sienjam ban mih shakhmat naka bynta ban pyntih ïaka surok bad pynbha da ka kor puh shilum ryngkat ka jingïatrei jong ki dkhot ka RBYF.
Kila pynpaw ruh ba kum ki paidbah ha katei ka shnong ki ïakynduh bun ki jingeh haki snem bala leit noh bad kane ka pynlong ïaki paidbah ban mad jingeh haka leit ka wan, khamtam ki khynnah skul bad ka pang ka shitom ba ki slem ban poi sha ki skul bad kumjuh sha ki jaka sumar kaba lah pat ban wanrah ïa kano kano ka jingjia ba sngewsih.
Naka liang ka seng RBYF bad ki nongïalam shnong kila kyrpad ruh sha ka sorkar ba dei ban phai khmat khamtam u nongmihkhmat ban pynioh surok rong ïaa katei ka shnong naka bynta ka jingmyntoi jong ki paidbah bad ban pynsuk haka leit ka wan kumba u surok u dei u budlum jong ka roi ka par.