“Nga don ka jingkitkhlieh bad ka thong ban kyntiew ïa ki kam ïalehkai” : Bah Shakliar
![](https://mawphor.com/wp-content/uploads/2022/05/Sports-2-750x430.jpg)
Shillong, Lber 10 : “Nga dei u Myntri ba dang khynnah tam ha kane ka Sorkar bad nga don ruh ka jingkitkhlieh bad ka thong ban dang kyntiew shuh shuh ïa ki samla bad ïa ki kam ïalehkai hapoh ka jylla,” ong u Bah Shakliar Warjri uba dei u Myntri badei peit ïa ka tnad ki kam ïalehkai jong ka Sorkar Jylla.
Ïa kine ki kyntiew u Bah Shakliar Warjri u la ong haba ai jingkren kum u Kongsan ha ka jingpynkup burom ïa ka kynhun ïalehkai jong ka Jylla kiba la poi shaduh ka phainal ha ka lympung ïalehkai phutbol Santosh Trophy, ha ka jingïalang ha ka sngi Thohdieng ha madan Ïewrynghep, Laitumkhrah ba la pynlong da ka tnad Sports and Yourh Affairs.
U Bah Shakliar u la ong ba tang hadien shi sngi ba u la rung ha ka ophis treikam, u la ïoh ka lad ban ïadonlang ban pynkup burom ïa ki nongïalehkai phutbol kiba la wanrah ïa ka nam bad burom ïa ka jylla hi baroh kawei. “Nga dap da ka jingsngewkmen ba tang hadien shi sngi ba nga la rung sha ka ophis treikam, nga la shah khot ban ïadonlang ha kane ka sngi ban pynkup burom ïa ka kynhun ïalehkai phutbol jong ka jylla,” ong u Bah Shakliar.
U Bah Shakliar u la ong ruh ba kum u Myntri badei peit ïa kane ka tnad, u don ka thong ban nang kyntiew shuh shuh ïa ki kam ïalehkai hapoh ka jylla, da kaba sam ki khusnam bad lyngba ka jingpynbit pynbiang ïa ki jaka ïalehkai nalor kiwei kiwei kiba ki nongïalehkai ki donkam.
“Lehse kane kadei tang ka jingpynkup burom kaba rit, hynrei nga kyrmen skhem ba nangne shakhmat ka sorkar kan sa ai shuh shuh ki jingïarap kiba kham heh. Ki jaka ïalehkai kiba donkam tam ban dang kyntiew shuh shuh ïa ki kam ïalehkai hapoh ka jylla,” la ong u Myntri.
U la ai khublei ruh ïa ka kynhun ïalehkai phutbol kaba la wanrah nam bad burom ïa la ka jong ka jylla. “Kadei ka sien kaba nyngkong ba ka Meghalaya ka la ïoh rung sha ka phainal. Watla mynta phi khlem poi sha ka thong, hynrei nga kyrmen skhem ba ha kawei ka sngi phin sa wanrah syndon ïa ka trophy jong ka jingjop. Nga kyntu ba phim dei ban duh mynsiem lane kynran dien noh hynrei to phin dang trei shitom khnang ba phin lah ban ïohrah ïa ka jingjop,” ong u Bah Shakliar Warjri uba dei u Myntri ba dang khynnah tam ha kane ka Sorkar MDA-2.0.
U Bah Shakliar Warjri nalor ba udei u Myntri Sorkar ba dang khynnah tam, udei ruh u Myntri ba nyngkong eh jong ka Sorkar MDA-2.0 ban ïadon bynta lang kum u Kongsan ha ki prokram Sorkar.