Shillong, Nailar 16: U Lat ka Jylla Meghalaya u CH Vijayashankar ula pynher ïa ka lama ka ri ha ka Sngi Thohdieng ha Lok Bhavan kum ka dak ban kynmaw ïa ki sngi ba ngiew ha ka jingphiah ïa ka Ri ne “Partition Horrors Remembrance Day 2026”.
Kane ka jingïalang kala ai burom ïa kito kiba la mad ïa ki jingeh bad jingtynjuh na ka jingphiah ïa ka ri India.
La pynlong ïa ka jingsngap jar kaba 2 minit bad la pynbud pat da ka jingrwai ïa ki jingrwai ieid ri ha ktien Garo, Jaintia bad Khasi da ki samla pule, ka jingpyninam ïa ka kolshor kaba bunjait jong ka Jylla.
Ha kane ka jingïalang la ïadonlang u HC Chaudhary, IFS, Additional Chief Secretary jong u Lat ka Jylla, ka heh ophisar Kong Camelia Doreen Lyngwa bad ki ophisar na ka tnad Arts & Culture bad ki khynnah skul. U Dr David Arnold Kharchandy u Assistant Professor jongka Synod College ula ai jingkren ha kane ka jingïalang.
Ula banjur ïa ka jingdonkam ban kynmaw ïa ka dor jong ka jinglen lade ki paitbah na ka bynta ka jingphiah bad ban rah shakhmat ïa ka lynnong jongka jingsuk, jingïatylli bad ïa ka jingim suk jingim saiñ lang hapdeng baroh na ka bynta ki pateng ki ban dang wan.
Kane ka prokram ka dei da ka jingthmu ban pynskhem ïa ka jingïar bad jingïatylli ha ka ri bad ïa ka jingburom mar kylliang hapdeng ki jaidbynriew ki bapher bapher.
