La rakhe ïa ka 80th Independence Day ha Khliehriat EJHD, pynher u bah Wailad ïa ka lama lai rong

Khliehriat, Nailar16: Ha ryngkat lang bad ka ri India hi baroh kawei, ka bor district jong ka East Jaiñtia Hills District ruh hynnin ka sngi ka 15 tarik u nailar ka la rakhe ïa ka sngi laitluid ka ri, ka 80th Independence Day, ïa ka prokram la pynlong ha madan jong ka Holy Family Parish Playground, Khliehriat bad u myntri ka sorkar jylla, u bah Wailadmiki Sylla u la pynher ïa ka lama lai rong jong ka ri bad shim ïa ka Rashtriya Salute jong ki 36 tylli ki kynhun ba kynthup ka kynhun jong ka Meghalaya Police, NCC Cadets, Scouts &Guides bad ki khynnah na ki skul bapher bapher ba na East Jaiñtia Hills District.
Kum ka jingai mynsiem bad pynshlur ban kyntiew ïa ka lariti, ka ophis jong u Deputy Commissioner, East Jaiñtia Hills District kala pynkup burom da ka khusnam ïa kito kiba dang shah hikai kiba la pyni ïa ka iGot Karmayogi Platform, kiba la ioh pdiang ïa ka khusnam ki kynthup ruh ka Junior Rural Development Officer jong ka Wapung C&RD Block, ka kong Nisaka Dkhar, ka District Programme Assistant, Swatch Bharat Mission (SBM), kakong Britney Langstang lem bad ki nongtrei kiba trei ha ophis u Deputy Commissioner, East Jaiñtia Hills District ba kynthup u bah Juhhi Nonghuloo, u Johnyson Enty Shadap, u bah Yoolangki Rymbai bad u Immonme Sutnga.
Ha kane ka sngi ba rakhe ïa ka sngi laitluid ka ri jong une u snem 2026 la pynkup burom bad ai khusnam ruh sha ki nongtrei jong ka tnat ka koit ka khiah kum ki top-performing Healthcare Institutions bad Healthcare Professionals kiba napoh ka district bad ïa ka khusnam Good Samaritan and Humanitarian Award la ai sha ka kong Jiny Sukhlaiñ kaba na shong Daistong kaba la leh bun ki kam ba bha bad jingleh sbun.
La sam ruh ïa ki Prize sha kiba jop ha ka March Past ha kaba ka skul Little Star Secondary School, Ladrymbai ka la rah ia ka nam lahduh, ka skul Jawahar Novodaya Vidyalaya (JNV), Rymbai (Girls), ka la long ba ar bad ka skul Oxford Secondary School, Ladrymbai (Girls) ka la long balai.
Ha kaba ïadei bad ka Cultural items Competitions, ka skul Little Flower Secondary School, Khliehriat, ka la ioh ïa ka nam lahduh, ka Sacred Heart Secondary School, Byndihati ka long ba ar bad ka Holy Trinity Secondary School, Sutnga ka long ba lai.
Kum shibynta jong ka jingrakhe, hadien ka prokram na madam, ki heh sorkar ki la leit sam ïa ki jingai sngewbha sha ki Shelter Home kiba don hapoh ka district.