Shimbynta ka SWKHs District ïa ka jingdap 80 snem jong ka jinglaitluid ka India

Mawkyrwat, Nailar 16: Kum shibynta ban ïasnohkitlang ha ka jingrakhe ïa ka sngi laidluid jong ka ri India, ka South West Khasi Hills District ruh ka la rakhe ïa kane ka sngi ba kyrpang jong ka Ri India ha ka sngi Saitjaiñ, ka 15 tarik u ‘Nailar, 2026, ha madan jong ka Nativity Higher Secondary School, Mawkyrwat.
Ha kane ka sngi, u Brening A. Sangma, MLA jong ka Kherapara Constituency bad Myntri jong ka Sorkar Meghalaya ba dei peit ïa ka Border Areas Development Department, Home (Civil Defence and Home Guards) Department bad Excise Department, u la pynher ïa ka lama jong ka ri bad shim ruh ïa ka Rashtriya Salute jong ki kynhun ïaid parade kiba kynthup ïa ki 8 tylli ki skul, ka NCC, ka Scouts, ka Guides, ka Pipe Band bad ka tnat Pulit.
Hadien ka March Past, la pynlong ïa ka Cultural Programme ba la ïa shimbynta da ki khynnah jong ka Little Star Higher Secondary School, Mawkyrwat, ka Nativity Higher Secondary School, Mawkyrwat, ka Sngap Syiem College, Mawkyrwat, bad na ka Nangtrei VO, Mawthawpdah.
Ha kaba ïa dei bad ka jingsam ïa ki khusnam ha ka March Past, ka JNV South West Khasi Hills District ka la ïoh ïa ka kyrdan ba nyngkong, bud sa ka Maharam Government Higher Secondary School, Mawkyrwat kaba wan ha ka kyrdan kaba ar, bad ka Balang Mawlangwir Higher Secondary School, Mawlangwir kaba wan ha ka kyrdan kaba lai. Hadien kata, la sam ruh ïa ki syrnod jong ka jingïashimbynta sha baroh kiba la don bynta ha ka Cultural Programme, kiba la pyni ïa ki sap lyngba ki jingrwai, ki jingshad bad ka jingpyni ïa ka skit.
Ha ka liang jong ka National Health Mission (NHM), la sam ruh ïa ki khusnam sha ki ASHA Facilitators bad ASHA Workers kiba la leh bha tam ha ka district na ka bynta ki snem 2024 -2025 bad 2025 – 2026. Ka kong Skialdaris Symbei na Mawhiangruda, kaba trei hapoh Wahkaji PHC, ka kong Babitha D. Shira na Allekwareng, kaba trei hapoh Ranikor CHC, kong Ribahun Turnia na Thangrai, kaba trei hapoh Ranikor CHC, bad ka kong Kyrshantilang Mawlong na Shngimawlein Village, kaba trei hapoh Mawthawpdah PHC, kiba la shah ithuh kum ka Best Performing ASHA Facilitator hapoh ka AF, ASHA bad JAS (PHC/SC). Nangta, ka kong Anita Lyngdoh na Nongbah Marshillong, kaba trei hapoh Mawkyrwat CHC, ka la shah ithuh kum ka Best Performing ASHA na ka bynta u snem pisa 2025 – 2026 hapoh Mawkyrwat Block.
Katba ka Rangthong PHC bad Phlangdiloiñ SC ki la shah ithuh ruh na ka bynta ka jingtrei kaba bha tam hapoh ka JAS (PHC/SC).
Ha kane ka jingïalang la wan ïashimbynta lang da ka kong A.L. Mawlong, IAS, Deputy Commissioner, South West Khasi Hills District, u bah B. Jyrwa, MPS, Superintendent of Police, South West Khasi Hills District, u bah L.G.M. Kharmih, MCS, Additional Deputy Commissioner, u bah I. Lawrniang, MCS, Block Development Officer, Mawkyrwat C&RD Block, ryngkat ki ophisar bad nongtrei jong ka district ha ryngkat ka jingsakhi jong ki paidbah nongwan peit kai na kylleng ki shnong.
Kum shibynta jong ka jingrakhe ïa ka sngi laitluid, la pynlong ruh ïa ka jingïakop ran tyllai bad ka jingïakop jngi-um kaba la tip kum ka 8th Annual Swimming Competition 2026 ha Phot Umnew, Mawkyrwat.
HA RANIKOR CIVIL SUB-DIVISION: Ha Ranikor Civil Sub Division u Shakliar Warjri, MLA jong ka Mawthadraishan Constituency, ula shim ïa ka bynta ban pynher ïa ka lama jong ka ri bad shim ruh ïa ka Rashtriya Salute na ki kynhun parade kiba kynthup ïa ki 10 tylli ki skul, kiba la ïalam da ka Meghalaya Police ha ka jingïalang ba la pynlong ha madan Nolikata, Ranikor.
Ha ka March Past, ka St. Thomas RCUP School ka la ïoh ïa ka kyrdan kaba nyngkong, bud sa ka Nibon Lower Primary School ha ka kyrdan kaba ar bad St. John RCUP School ha ka kyrdan kaba lai.Katba ka Nolikata Upper Primary School ka la shah pynkup burom kum ka Best Discipline School. Bad bud sa ka jingsam ruh ïa ki syrnod sha baroh ki nongïashim bynta ha ka Cultural Programme ba kynthup ïa ki skul bad ki Village Organizations (VOs) hapoh Ranikor Civil Sub-Division, ryngkat ka jingsam ïa ki jingbam sha ki khynnah.
Ha kane ka jingïalang la ïashim bynta lang da u bah L.T. Tariang, MCS, Sub-Divisional Officer, Ranikor Civil Sub-Division, u bah A.S.P. Marak, MCS, Assistant Commissioner, South West Khasi Hills District, u bah S. Marweiñ, MCS, Block Development Officer, Ranikor C&RD Block, ryngkat bad kiwei ki ophisar bad nongtrei jong ka district.