T. 28.91 Lak ai sngewbha ka Sorkar sha ka MFA ba wanrah nam ka kynhun ïalehkai phutbol na ka Santosh Trophy
Shillong, Lber 10 : Ka tnad Sports & Youth Affairs jong ka Sorkar Jylla ha ka sngi Thohdieng ka la pynkup burom ïa ka kynhun ïalehkai phutbol jong ka jylla kiba ïoh khurr takma Rupa bad kiba ïoh ban rung sha ka phainal ha ka lympung ïalehkai phutbol 76th National Football Championship for Santosh Trophy 2022-2023, hynrei ka la rem noh ha ka kynhun ïalehkai jong ka Karnataka ha King Fahd International Stadium, Saudi Arabia.
Na liang ka Sorkar ka la ai sngewbha sha ka Meghalaya Football Association (MFA) da ka cheque kaba kot sha ka 28,91,216 tyngka hadien ba ki rangïalehkai ki la wanrah ïa ka nam bad ka burom na katei ka lympung ha kaba kadei ruh ka sien kaba nyngkong ba ka Meghalaya ka la ïoh ban rung shaduh ka phainal. Ka jingpynlut ha ka jingpynkup burom ïa katei ka kynhun ka kot sha ka 33,41,216.
Kum shi bynta ban ai burom ïa ka kynhun bad pdiang burom, na ka liang ka tnad Sports & Youth Affairs, ka la pynlong shuwa da ka jingïaid paidbah da ki kali ne ka Open Truck Road Show, kaba la sdang na Madan Heh Mawlai Phudmuri – Jaiaw Jingthangbriew – Jaiaw St. Joseph – Jaiaw Langsning – Jaiaw Pdeng – Mawkhar Main Road – Motphran – Police Bazar – AG Office – Additional Secretariat – Barik – Malki Point – Dhanketi – Don Bosco Square – Laitumkhrah Beat House bad pynkut ha Madan Iewrynghep Laitumkhrah.
Ha shi lynter lynti na ka liang ki paidbah ki la ai khublei ïa kane ka kynhun kiba la shong ha ka truck kaba la pynkhreh janai bha ba la bud ruh ïa ki da ki ar shaka na shakhmat bad na shadien haduh ban da poi ha madan Ïewrynghep.
Ha kane ka sngi ïa ka kynhun ïalehkai phutbol ka jylla ba la mihkhmat da ka Meghalaya Football Association (MFA) la pynkup burom ïa ki da u Bah Shakliar Warjri uba dei u Myntri jong ka tnad Sports and Youth Affairs kum u Kongsan, ha ka jingïadonlang u Vibhor Aggarwal, IAS uba dei u Director ka tnad Sports and Youth Addairs, ki nongkitkam ka MSOA, MFA, ki State Association, kiba haïing hasem jong ki rangïalehkai bad ki paidbah.
Ka tnad Sports and Youth Affairs, ka la pynkup burom da kaba sam da ka song pisa kaba mar 20,000 hajar tyngka sha ki 22 ngut ki rangïalehkai, mar 5000 ïa 2 ngut ki coach bad 28,91,216 sha ka Meghalaya Football Association (MFA) ba la aiti da u Myntri jong ka tnad Sports and Youth Affairs u Bah Shaliar Warjri ha u Bah Larsing Ming Sawyan.