Shillong, Nailar 14: Ka Shillong Premier League 2026 kan sdang biang lashai ka sngi Hatmajai, 18 tarik Nailar 2026, ha kaba ka Meghalaya Police kan aireng pyrshah ïa ka Langsning FC, kaba bat ïa ka nam lahduh, ha madan First Ground-SSA Stadium. Kane ka jingïalehkai kan sdang ha ka por 4 baje nohphai sngi.
Ka Langsning ka la jop ïa ka jingïalehkai ba sdang jong ka samoi pyrshah ïa ka Sawmer, katba ka MLP ka la ïakhaid bad ka Rangdajied United.
Ka Shillong Sports Association (SSA) ka la pyllait ïa ka prokram ïalehkai ba dang sah ha ka social media ha ka sngi Thohdieng jong ka taïew ba ladep. Haduh mynta ka SSA ka la ïoh ban pyndep 7 tylli ki jingïalehkai jong kane ka samoi ba thymmai shuwa ba ka lympung kan sangeh shipor khnang ba kan nym don ka jingthut ïa ka prokram ïalehkai jong ka Durand Cup 2026 kaba dang ïaid shakhmat, ha kaba ki don lai tylli ki klob ka SPL – ka Shillong Lajong, ka Langsning bad ka Nongkseh kiba ïashim bynta.
Ka Langsning bad ka Nongkseh ki la khyllem noh na ka Durand Cup. Ka Lajong ka dang sah ha ka jingïakhun hynrei ka sei madan da ka kynhun kaba rangbah, katba ha ka SPL kiba bun kidei kiba dang samla.
Kiba bun ki jingïalehkai SPL kiba dang sah la buh ban sdang ha ka por 4 baje nohphai sngi, watla ki don katto katne ki jingïalehkai ki ban sdang kham hadien ha ka por janmiet.
Ka single leg league kan kut noh ha ka 10 tarik Risaw. Nangta ki hynriew tylli ki kynhun ba wan ha khlieh duh lane Top 6, kin rung sha ka SSA Super Cup, bad ka kynhun kaba wan ba-ar bad kaba jop nam lahduh jong ka SPL ruh kin ïoh ban ïashim bynta ha ka SSA Champions Cup hadien kata.
