Jowai, Nailar 16: Ka Dkhiah West SCSO bad ka Suchen Lumiarain SC ki la jop ïa la ki jong ki jingïalehkai jong ka lympung Second Division 2026 League Stage bala pynïaid daka East Jaiñtia Hills District Football Association (EJHDFA), hynne ka sngi Thohdieng (14 tarik u Nailar, 2026) ha madan Artificial ha Diengshynrum, Khliehriat.
Haba phai sha ka jingïakhun kaba nyngkong la sakhi ïa ka Dkhiah West SCSO kaba la wanphai na ka shi kol ban jop da 4-1 kol ïaka Lakadong Ummat SSC.
Ha ka jingïalehkai dei ka Lakadong Ummat kaba la lamkhmat nyngkong lyngba ka kol jong u Fibami Chadong (13’) hynrei ka Dkhiah West scso ka la jubab lyngba u Dawrupaya Tlang (26’) ban pynïakhaid ïa ka jingïakhun ha ka kylla step. Nangta ka la wanphai da kaba tyngeh ha ka kylla miet ban thep sa lai kol lyngba u Nevermine Kya (56’), u Donjingkyrmen Kya (71’) bad u Stayphan Phawa (80+3’).
Katba na ka liang jong ka Suchen Lumiarain SC kala jop da tang 1-0 kol ïa ka Khliehmyntriang SC, bad ïa kane ka namtam la thep da u Hamedahun Lamurong tang haka minit ba 5.
Kawei pat ka jingïakhun hapdeng ka Lumshken SC bad ka Lama Youth SC, ka la kut ha ka jingïakhaid khlem da don ba lah ban pynkhihjar (0-0).
