Bteng khur jingjop ka Thangsning bad Lumpaia ha ka District League T20
![](https://mawphor.com/wp-content/uploads/2022/05/Sports-2-750x430.jpg)
Shillong, Rymphang 20 : Ka Thangsning SCC bad ka Lumpaia Avengers CC ki la bteng da kaba khur jingjop ha ka lympung ïalehkai cricket ba la pynïaid da ka East Khasi Hills Cricket Asscociation (EKHCA) ka 2nd District League T20 Cricket Tournament 2023 ha ki jingïalehkai ha ka sngi Nyngkong.
Ka Thangsning SCC ka la khur jingjop da kaba pynliem da 5 wicket pyrshah ïa ka Friends United CC katba ka Lumpaia Avengers CC ka la khur jingjop da kaba pynliem da 5 wicket ïa ka Pomshutia CC.
Ha ka jingïalehkai kaba nyngkong hapdeng ka Thangsning SCC bad Friends United CC, ka Thangsning SCC kaba la jop ïa ka jingkynting pisa ka la ailad tied nyngkong ïa ka Friends United CC kaba la kamai 112 ron duh noh 8 wickcet ha ki 20 over.
U Bryan Mac Millan Marbaniang udei uba la kamai bun ron tam napdeng ki rangtied jong ka Friends United CC da 27 ron na ki 23 bol bad u Khrawkupar Kharumnuid u ïoh ban khur 2 wicket bad ai kamai 11 ron ha ki 4 over na ka bynta ka Thangsning SCC.
Ka Thangsning SCC haba beh ïa katei ka thong ka la lah ban pyndep tang ha ki 15.5 over da 113 ron duh noh tang 5 wicket ha kaba u Badap Pura Nongkhlaw u kamai 39 ron na ki 38 bol, u Khrawkupar Kharumnuid u kamai 34 ron na ki 29 bol bad u Wansiewdor Lyndem u khur 3 wicket ai kamai 14 ron ha ki 3 over na ka bynta ka Friends United CC bad ïa ka nam Player of the Match la ïoh da u Khrawkupar Kharumnuid.
Ha ka jingïalehkai kaba ar, ka Pomshutia CC ka la kam ban tied nyngkong hadien ba ka la jop ïa ka jingkynting pisa hynrei na ka jinglah ban ïalehkai bha ki rangkawang bol ka Lumpaia Avengers CC, ka la ïoh ban kamai tang 54 ron khyllem noh 10 wicket ha ki 13.5 over.
Dei tang u Aristerwell Suting uba ïoh ban kamai 10 ron na ki 22 bol, katba u Ralphy Heinrich Diengdoh u khur 3 wicket ai kamai 14 ron na ki 3 over bad u Daryll Donald Nongbri u ïoh 2 wicket ai kamai 4 ron na ki 2.5 over.
Ïa katei ka thong ba la buh da ka Pomshutia CC, na ka liang ka Lumpaia Avengers CC ka la lah ban pyndep tang ha ki 11.5 over da kaba kamai 58 ron duh noh 5 wicket. u Easterland Iangrat u kamai 20 ron na ki 33 bol bad u Aristerwell Suting u khur 3 wicket ai kamai 15 ron na ki 4 over katba ïa ka nam Player Of the Match la ïoh da u Ralphy Heinrich Diengdoh.