Baroh ngi tip ïa ka jingbamsap ka MDA bad ka BJP kam lah ban thet kti: Mukul Sangma

Shillong, Rymphang 18: U nongïalam jong ka Trinamool Congress Legislature Party uba dei ruh u nongïalam ka Liang Pyrshah u Dr. Mukul Sangma ha ka sngi Saitjaiñ u la takraiñ tyngeh ïa ka jingkynnoh u Amit Shah ba ka jylla Meghalaya ka dei kaba bamsap tam namar ka BJP ruh ka donlang ha ka MDA.
Haba kren ha ka jingïalang na bynta ki kyrtong ka TMC ha Gambegre, Rongara Siju bad ha Raksamgre u Dr Mukul u la ong ba kane ka jingthet kti ka BJP ka dei ka jingleh arsap suda ban pynbiej paid-bah.
“Baroh ngi sakhi ba ka MDA ka la dei ka sorkar ba bamsap tam la ha kaba ïadei bad u khaw, ne u smart meter, ka jingthied kali ha ka tnat pulit bad kiba bun bah kiba ngim lah ban jer hynrei ban ong ba ka jylla ka dei baroh kaba bamsap ngi te ngim pdiang namar ngim don bynta bad kane ka sorkar MDA hynrei ka BJP hi kaba don lha ka sorkar,” u la ong.
U la ong ruh ba ka jingkren u Amit Shah ka dei ka buit poh suda bad ba ki paidbah ka jylla ki dei ban tip ïa ka kam bamsap kaba jur ka BJP kaba baroh ki nongshong shnong ka jylla ki dei ban snoh kti lang ban ïakhun ïa ka BJP.
“Baroh san snem naduh u 2018 balei ka sngap jar beit ka BJP haman ki kam bamsap hynrei balei ka kyndit thiah kynsan mynta,” u la buh jingkylli.
“Ngi la pyrshang ban kren ïa kane ka mat bad wat ban ai jingthoh ruh sha ka ophis u Prime Minister arsnem mynshuwa hynrei aiu ki la leh. Ngi dei ban sngewthuh ba ka BJP ka don lang ha ka MDA dei na kata ka daw ka sngapjar baroh shikatto hynrei ka kren mynta namar ka la dei ka por elekshon,” u la bynrap.