Ryngkat ka District Tuberculosis, ha Pamra Paithlu PHC sam jingbam tei met ka Star Cement ïa kiba pang TB
![](https://mawphor.com/wp-content/uploads/2023/02/IMG-20230214-WA0003-1.jpg)
Khliehriat, Rymphang 15: Ha ryngkat ka jingïatreilang bad ka ophis jong ka District Tuberculosis Officer, Jaiñtia Hills District, Jowai, ka tnat CSR jong ka company Star Cement, hynnin ka sngi ka la sam ïa ki jongbam teo met ïa kito kiba don ïa ka jingpang Tuberculosis (TB), ha Pamra Paithlu PHC, East Jaiñtia Hills District, kaba long shibynta kum ka jingnohsyniang sha ka imlang ka sahlang lane ka Community Support Scheme.
Kane ka prokram ka long ruh ban ïakhun ban rat diengkhong ïa ka jingpang TB kaba long katkum ka jingthmu ne jingbuh thong kaba katkum ka Pradhan Mantri TB Mukt Bharat Abhiyan (PMTBMBA), kaba don ka thong ba rat diengkhong ïa ka jingpang TB.
Haba kren ha ka jingïalang ba la pynlong ha Pamra Paithlu PHC, ka District Tuberculosis Officer, Jaiñtia Hills District, Jowai, ka Dr. E.V.B.Laloo, ka la batai shai shaphang ka jingpang TB bad kumno ban sumar ban koit na kane ka jingpang, ka la ong ruh ba kane ka jingpang ka long kaba iabit bad ka saphriang sha kiwei pat lyngba ka jyrhoh, synriah, na kata ka daw kiba don ïa kane ka jingpang TB ki dei ban deng ïa ki mask ban lait na ka jingsaphriang ka jingapng sha kiwei, ka la kyntu ruh ïa kiba don kane ka jingpang ba ki dei ban dih dawai tisata, ban pydep ïa ka por ba la buh ban dih dawai bad ong ruh ba ki briew ki lah ban leit leh ïa ki TB test ha Khliehriat Civil Hospital bad ha Sutnga CHC.
Ha kane ka sngi, kiba pang TB bad ki nongtrei ka koit ka khiah ki la shim ruh ia ka pledge ban pynlong ia ka ri India kaba lait na kane ka jingpang TB kat haduh u snem 2015.
Ka District Tuberculosis Officer, Jaiñtia Hills District, Jowai, ka la sam ïa ki hynñiew jait ki jait jingbam sha ki ar phew ngut kiba pang TB kiba la wan ha katei ka sngi, ki jingbam kiba kynthup ka dud, pylleng, u khaw, Soya Chunks, Lentils, ka umphniang bam bad kawei ka borti um ba u ne ka nongpang ki lah ban pyndonkam ha ïing.