Jowai, Rymphang 15: Ka Hynñiewtrep National Youth Front (HNYF) West Jaintia Zone mynta ka 15 tarik u Rymphang kala ïoh ban bat ïa u Challami Phawa uba naka shnong Ialong WJHD hadien ba ula kular ban thung kam ïa ki briew hapoh tnad PWD da kaba ula dawa pisa naki khnang ba kin ïoh ban trei hapoh ka tei ka office.
Hadien baka seng kala ïoh ïaki jing ujor na ki ar ngut ki briew ba shah dawa pisa, kila wad ki lad ki lynti khnang ban ïoh kem ïa u tei u briew bad hadien ka jingïa kynduh ïa utei u briew naka liang jong ka seng kala shim ïaka rai ba u dei ban siew noh ïa ka pisa jong ki tei ki briew kaba long 75,000/- Hynñiew phew San hajar tyngka kaba ula shim naki da kaba ai por hapoh artaïew ha ryngkat ka soskular (agreement) bad lada um lah ban siew hapoh katei ka por ba la buh naka liang jong ka seng bad kitei ki briew kin liet ban ujor daka FIR pyrshah ïa utei u briew.
Ha ka juh ka por ka seng ka kyrpad jur ïaki paidbah ba kim dei ban ngiet ïa kum kine ki jait jingkular namar kan shem jynjar wat ïa ka tnad Pulit ban shem ïakum kine ki briew ba kular ai kam la pynkut ka kyrwoh na u President ka seng u H.W. Sutong.
