Byrngem ki paidbah ban leit tur sha ka ophis u EE PWD ban phah weng ia u Contractor

Nongpoh, Iaiong 16: Ka Synjuk ki Rangbah Shnong Nonglyndoh bad Nongkhrah ha ka 14 tarik u Iaiong ki la pynlong syndon da ka jingialang paidbah jong ki paidbah nongshong shnong na kitei ki ar tylli ki Raid na ka bynta ban ia kren halor ka jingpynsahteng u Contractor ia ka surok ban siang rong bad kaba la buh jjingeh ia ki paidbah la bun snem mynta ha ka leit ka wan ba u Contractor ba la ai kam da ka sorkar um lah satia ban siang rong kumba la buh por da ka sorkar.
Ia kane ka jingialang la pynlong ha Madan Mawiong ha kaba la wan ban iashimbynta da ki rangbah shnong jong katei ka synjuk, kiba kynthup iaka Nongtyrlaw, ka shnong Pahambirthem, ka shnong Pahamshiken, ka shnong Pahammardoloi, ka shnong Mawiong, ka shnong Pahambirlum kynthup iaki paidbah nongshong shnong kibala pynpaw ka jingbitar halor ka jingpynsahkut u Contractor ia ka surok ban siang rong na Pahambir sha Mawiong kaba don tang kumba 3 km ei ei ka jingjngai.“
Ha katei ka sngi la wan ruh ban kyrshan lang da u Bah Marcus Marten, President ka HNYF Northern Region bad uba dei ruh u Vice President ka HNYF Sengkmie ban kyrshan borbah halor ka jingshah iehnoh bein ki paidbah ia katei ka surok kaba la dei ban dep ban siang rong bad na ka daw ka jingpynsahtegn u Contractor ka la sahkut haduh mynta la kumba saw snem tam mynta.
Kum ban pynpaw paidbah, ka Synjuk ki Rangbah Shnong Nonglyndoh bad Nongkhrah ki la pynlong ruh ia kane ka jingialang lane ban lum ban lang ia ki paidbah nongshong shnong, ka dei halor ka jingleh kyllut ka tnad PWD ban phah pyndep siang rong noh ia katei ka surok, kaba la sahkut mynta la saw snem tam ei ei khlem da pyndep da u contractor ba la ai kam ban siang rong ia katei ka surok.
Ha katei ka sngi la ai jingkren ruh naduh ki nongialam ka Synjuk bad kynthup ruh u president ka HNYF Northern Region, u Bah Marcus Marten, kiba la pynrem jur halor kane ka jingaimon ka tnad PWD ia u Contractor uba khlem lah ban pyndep ia ka kam ban siang rong kumba la buh da ka sorkar.“ Ka sur na kiba bun ba lang bad kynthup ruh naduh kitei ki nongialam bad ki paidbah ha katei ka sngi ki la shim ruh ka rai ban mih paidbah ban leit tur sha ka ophis u EE PWD, Nongpoh Division ban dawa weng noh ia u Contractor uba khlem lah ban siang rong ia katei ka surok bad ha kawei ka bynta ki la pynpaw ruh ba lada ka tnad PWD ka dang leh sting kum ki paidbah ryngkat ki synjuk kim banse ban shim noh da kawei ka lynti ban ia pyrshah namar ban shem jingeh ki paidbah tang na ka daw u Contractor ka long ka kam kaba kim lah ban pdaing bad ki paidbah ki syrtok ha ka leit ka wan.