Shillong, Rymphang 10 : Ka Congress hynne ka sngi thohdieng, kala kyrpad ïa ka Election Commission ban ai biang ïa ki bor pahara ïa u Kyrtong jongka na Gambegre u Saleng A Sangma namar ka jingnang jur ki jingma ba ap ïa ka jingim jong u.
Haba pynrem ïa ka jingpynhiar kput shimet ïa u Saleng, ki Media Coordinator ka AICC Adv Mathew Antony bad ka Bobbeeta Sharma lem bad u General Secretary ka AICC Sanjay Das, kila ong “ Ngi kyrpad ïa ka Sorkar Jylla bad ka ECI ban ai biang ïa ka bor pahara ïa u kyrtong jong ngi u Saleng Sangma namar ka jingnang jur ka jingma ba ap ïa u”.
Kine ki Nongïalam ka Congress kila ong ba u Saleng Sangma ula kyntait ba u la phetkrad lane shah behkthong ha ka kynhun ki Flying Squad bad dawa ban sei madan ïa kino kino ki video clip halor kane, lada ka kynhun peitngor ka don.
“Tang namar kane ka jingjia, la weng ïa ki bor pahara na u Saleng bad la suba jur ba kane ka dei ka buit kam saiñ pyrthei bad ka jingpynhiar kput na ka Liang Synshar” kila kynnoh.
Ka Congress kala pynrem jur ruh ïa ka jingïai pyrshah Khristan jong ka BJP bad ong “Ngi pynrem jur ïa ka kam jong ka Janajati Dharma Sanskriti Suraksha Manch (ka seng ba kyrshan da ka RSS) ba ïadei bad ka jingdawa ban weng noh ïa ka jingithuh ïa ki briew bala kylla niam Khristan kum ki Schedule Tribe”.Kat kum ka jingong jong ki, kane ka long pyrshah ïa ka mynsiem ban burom ïa ka jinglong tynrai jong ki Schedule Tribe jong ka thaiñ Shatei Lam Mihngi, khamtam ki paid Khristan ha Meghalaya bad Nagaland.
Ki Nongïalam ka Congress kila ong ba ka jingpynduh long ST ïa ki paid riewlum bala long Khristan ka dei kaba la leh da ka jingthmu ban weng noh ïa ka hok ba kila ïoh lyngba ka Sixth Schedule jong ka Riti Synshar ka Ri.
“Ngi dawa ba kin panmap bad weng shisyndon ïa kane ka jingdawa na ka BJP bad ban pyllait ïa ki paid riewlum ka thaiñ Shatei Lam Mihngi na ki jingma ba ïadei bad ka snap kyrpang jong ki” kila ong.
