Wad biej shuh, pyndonkam ka bor pyrkhat, peit ïa ka lawei shuwa ban Vote: Sadon Blah

Shillong, Rymphang 10: U President ka Hynñiew trep National Youth Front (HNYF) u Bah Sadon Blah u la ong ba ka jingjied nongmih khmat mynta ka kynti ka dei ban long kaba kum ki nongshong shnong ka jylla ban da pyrkhat jngai bad da pyndonkam ïa ka bor pyrkhat shuwa ban vote.
Haba kren sha ki lad pathai khubor u Bah Sadon u la ong ba kum ka jaidbynriew ka por ka la dawa palat palat ban jied nongmihkhmat noh da ka jingstad ym ban shu shongshit ha ki kam tamasa jong ki kyrtong.
U la ong ba ki paidbah ki dei ruh ban sngewthuh ba kum ka jylla ba wat hadien 51 snem ba la ïoh ïa ka jylla pura hynrei lada peit ha baroh ki liang ka shuh long lyngkrang lut namar ym don sorkar satia kiba don jingkit khlieh ban wanrah da ki policy ban myntoi u paidbah ka ri.
“Phin peit ïa ka pule puthi ruh ka sniew dur shaba palat liam, phin peit ïa ka koit ka khiah bad ki jaka sumar ruh kaba i sangsot, phin peit ïa ki nongrep ruh ym don policy ban kyntiew ïa ki, phin peit wat ïa kata ka Tourism kaba ki sorkar ki kob baroh baroh hynrei la shu pynsah lyngkrang, ka ïohkam ki samla lei kaba i duh jingkyrmen bha, ngi kum ka seng ngi kwah ba u paidbah un buh ïa kine ki mat ha shyllang bad ki jingpyrkhat shuwa ba ki vote bad ba u paidbah u dei ruh ban vote da ka jingstad bad ka jingïohi ïa ka lawei jong ka jylla,” u la ong.
U la ong ruh ba ka long kaei kaei kaba da khylla shisha ha ka jaidbynriew jong ngi namar wei la poi ka aiom elekshon kiba bun ki paidbah ki kyndeh elekshon bad ïa kyrsum ha ka tamasa ka muja ki seng saiñ pyrthei khlem ju pyrkhat kaei pat kaba ki la leh ha ki saw snem 9 bnai.
“Ka long kaei kaei kaba khyllah ïa ka jaidbynriew jong ngi namar ki paidbah ha baroh 4 snem 9 bnai ki wan beit man ki jingeh sha ki seng bhalang ban pan jingïarap namar kita ki nongsynshar kim leh eiei hynrei tang shu poi pat lai bnai shuwa ka elekshon ki juh ki briew kiba la mad ïa ka jingleh ka sorkar dei ma ki kiba leit muja leit shad bad ki seng saiñ pyrthei bad vote ruh ïa uta uba pynbiej khlem da pyrkhat ïa kaei kaba ki la mad ha ki saw snem tam,” u la ong.
Shuh shuh u la ong ba ka jingpyrshang ki seng saiñ pyrthei ban pynlong ishu elekshon ïa ka mat ka ILP ka long kaei kaei kaba kum ka jaidbynriew ngim lah ban pdiang.
“Haba ïadei bad ka ILP baroh 60 ngut ki MLA ki la pheil ïa kane ka mat bad baroh ruh ki seng saiñ pyrthei ki la pheil ym tang kiba don ha kane ka sorkar kaba mynta wat ki seng kiba don ha ka sorkar shuwa u 2018 ruh,” u la ong.
“Lada ka BJP kaba don MLA hangne bad synshar ha Delhi, ka NPP kaba dei ka paralok jong ka BJP, ka UDP, HSPDP, PDF bad baroh hi ki seng ki la shu lehkai ïa kane ka mat. Lada ngi peit sha ka Congress ruh hapoh ka jingïalam u Mukul kum u Myntri Rangbah ka jylla ha kito ki por ka la kyntait ïa ka ILP bad mynta baroh baroh ki kwah ILP bad nga ïohi ba kane ka mat ka la shu long tang ka mat saiñ pyrthei jong ki party ban pynbiej ïa u paidbah,” u la bynrap.
Ha kane ka sngi na ka liang ka HNYF ka la pdiang ruh ïa ka jingiehnoh ki arngut kum ki dkhot jong ka, kata u Bah Wandonbok Jyrwa bad ka Kong Bety Jyrwa kiba la rai ban rung noh pat sha ka jylli ka saiñ hima bad na ka liang ka seng ka phah ïa ka kitbok kit rwiang ïa kine ki arngut ki dkhot barim jong ka.