Shillong, Rymphang 10: U MP jong ka Seng Trinamool Congress ha Rajya Sabha, u Derek O’Brien, u la rah ïa kiba bun tylli mat ba donkam na ka bynta ka Meghalaya ha Parliament kaba dang shu kut ha kine ki sngi kiba ladep.
Kane ka jingrah une u Nongïalam ki MP ha ka TMC ha Rajya Sabha kadei ha ka por ba ki MP jong ka jylla ki dang bunkam bad ka jingpynkhreh ïa ka elekshon ha ka jylla.
Ha ka 7 tarik mynta u bnai,katab ka Meghalaya ka dang shongshit pynkhreh elekshon, u O’Brien u la rah ïa ka mat kaba ïadei bad ka jyrsieh na u Smart Meter, kaba haduh mynta kam pat shai satia balei ba ka dor ka kiew shaba palat. Kawei pat ba u MP ka Rajya Sabha ha West Bengal u la rah ka long halor jyrsieh thied kali ka tnad Pulit kabala pynsyrwa ïa ka pisa jong u paidbah ka jylla. Kawei pat ka mat kaba u la rah kadei ka jingkhyllem jong ka tnum pyllun ne u dome ha ka ïingdorbar Thawaiñ ba dang shna jong ka Meghalaya Legislative Assembly bad kaba lyngngoh u la ong ba ïa kane ka ïingdorbar Thawaiñ jong ka jylla la shna da ka kompenu na Uttar Pradesh, ka Uttar Pradesh Nirma Nigam Ltd.
U Derek O’Brien, u la khyrwit tyngeh ruh ïa ka jingbym lah ka sorkar Meghalaya ban teh lakam ïa ka jingkhaïi tuh ïa u dewïong, kaba la pynlong ïa ka ïingbishar Supreme Court bad High Court of Meghalaya ban tuklar na ka por sha ka por kaba mynta lei lei ka ïingbishar jong ka Meghalaya ka la hukum ban talasi syndon da ki bor Pulit jong ka sorkar pdeng. “Kaei kane kaba jia”, la ong u O’Brien haba ïakren bad ki nongthoh khubor ha Shillong. Nangta u la rah ruh ïa ka mat kaba ïadei bad ka jingpynrung ïa ka ktien Khasi ha ka riti synshar jong ka ri India, kaba ki paidbah jong kane ka jylla ki la angnud la slem. Kiwei pat ruh ki MP ka TMC ha Rajya Sabha, ki la ïakren halor kane ka jingdawa ban pynrung ïa ka ktien Khasi ha ka Khyrnit kaba phra jong ka Riti Synshar ka ri India.
U Parliamentary Leader jong ka TMC ha Rajya Sabha, u la ther ruh ïa ka sorkar pdeng halor ki kam pynroi ha ka thaiñ shatei lammihngi ka ri India, kaba u ong ba na ki 36 tylli ki Projek, ka sorkar pdeng haduh u 2021 ka dang mang pisa tang ha ki 8 tylli ki projek.
Shuh shuh ki lai ngut ki MP ka TMC, ki la rah ruh ïa ka mat kaba ïadei bad ka jingshah thombor ki Khristan ha ka thaiñ shatei lammihngi jong ka ri India bad ha kiwei de ki bynta jong ka ri India, kaba long pyrshah ïa ka riti synshar jong ka ri India, namar ka Article 25 jong ka Riti synshar ka ri India ka ai laitluid ïa ki nongshongshnong ban mane blei ha la ka mon jong ki.
Haba ïakren bad ki nongthoh khubor halor ka kam khaïi dewïong beaiñ, u President jong ka Meghalaya TMC, u Bah Charles Pyngrope uba don lang ha ka jingïalang bad ki nongthoh khubor, u la ong ba ka long ka jinglehraiñ ïa ka sorkar jylla ba kam lah satia ban teh lakam ïa ka jingkhaïi tih dewïong tuh bad u la ong ruh ba ka long kaba sngewdiaw ba ki Pulit ki la shah pynngat ha ki kyndon pyrshah ïa ka ïingbishar.
Shuh shuh u O’Brien u la ong ba ka TMC ka kren ïa kane na ka bynta ka jingbha jong ka jylla Meghalaya ba kim kwah ban ïoh nong eiei na Meghalaya hynrei kum ka Seng ka don ka jingsngewkhia na ka bynta kane ka jylla. U la kop ruh ïa ki National Party ba ki Regional Party ba kin pyni lada ki don tang 2 minit ka video ba ki la kren eiei halor ka Meghalaya ha kine ki shiphew sngi ba long ka Parliament.
