Nongpoh, Ïaiong 15: Da ki phew tyllli ki ing ki sem ha Ri Bhoi ki la shah pynjulor naphang ha ka eriong bad ha u phria uba la wan ban pynjot naphang bad bun ki longing longsem ki la shah ktah jur bad don ruh kiba ym ïoh shuh wat ban shong ban sah ba ka eriong ka la pynjulor ïa ka ing ka sem jong ki.
Kane ka jingjia ka la jia hynnin ka sngi Palei ha Ri Bhoi District ha ka por 12 baje ei ei mynsngi ha kaba ka eriong bah ryngkat bad u Phria ki la wan ban syllad kynsan kynsan ha kaba bun ki ing ki sem ki la shah pynjulor bad don ruh kiba la shah ktah jur haduh ba ym long shuh ban shong ban sah ba ki ing ki sem ki la julor phom.
Kumnba la ïoh lum jingtip ki shnong kiba la shah ktah jur ha kane ka jingwan lynshop ka eriong bad u phria ki kynthup ïa ka shnong Lumnongrim Dewlieh, Umtrew, Syadrit, Syadheh, Kyrdemkulai, Umroi, Bhoirymbong bad kiwei kiwei ki shnong kiba ym pat ïoh jingtip ba paka ki la shah ktah ha akne ka eriong bah.
Ha kane ka jingjia, ka eriong ka la pynjulor ym tang ïa ki ing ki sem bad kane eriong ka la pynjulor ruh ne pynkylon ruh wat ki diengbah, ki sainar bad post elektrik bad wad ki jingthung jingtep kiba la ktah shisha na ka bynta kito ki longing kiba la mad ïa kane ka jingjia ba sngewsih.
Kiba bun ki longing long sem ki laba la shah ktah ha kane ka jingjia ki la pynpaw ka jingsngewsih kaba khraw ba tang ba ki la duh ki jingdon jingem naduh u khaw, u kba, ki tiar ki tar, ki jain ki nep ba la pynjulor da kane ka eriong, hynrei ka jingduh jongki ïa ki ing ki sem ka la long ka jingduhnong kaba khraw ba kum ki longing ba shah ktah ki la kyrpad sha ka sorkar ba kan phai khmat lem bad khamtam ban pynpoi lem ki jingiarap na ka bynta ban iarap lem ha kane ka jingshah ktah ha kane ka eriong bah.
Na kane ka jingwan lynshop ka eriong bah, ki paidbah ha Ri Bhoi District naduh ka sngi Palei shiteng sngi bad haduh mynta ka sngi Saitjain ki la hap ban shong hapdeng ka jingdum khlem ka bording ilektri, bad ka daw ka long ba kane ka eriong ka la pynjulor naduh ki sainar bad kynthup ki post ilektrik ba ka tnad MeECL ka dang wad ïa ki jak aba shah ktah bad ban pynbha ïa kito kiba la shah pynjot ha kane ka eriong bah.
