Jowai, Rymphang 07: Ka jingwan thep kyrteng (Nomination Paper) jong ki kyrtong bapher bapher napoh ka West Jaiñtia Hills na ka bynta ki 5 tylli ki Constituency kiba kynthup ïa ka 1-Nartiang, 2-Jowai, 3-Raliang, 4-Mowkaiaw bad ka 7-Amlarem kila poi sha ka 26 ngut baroh.
Ki kyrtong na ka 1-Nartiang Constituency ki don 5 ngut kita ki long u ma Sniawbhalang Dhar na ka NPP, ma Dawan Lyngdoh na ka seng UDP, ma Emlang Laloo na ka seng Congress, ma Rimiki Sari na ka BJP bad ma Generous Pasleiñ kum u kyrtong shimet, na ka 2- Jowai Constituency 5 ngut ki kynthup ïa ma Wailadmiki Shylla u kyrtong ka NPP, ma Awhai Andrew Shullai na ka AITC, ma Moonlight Pariat na ka UDP, u ma Daniel Dan na ka INC bad ma Allan Keith Suchiang u kyrtong ka BJP. Na ka 3-Raliang 6 ngut ki long ma Coming-one Ymbon na ka NPP, ma Lakhon Biam na ka BJP, ma Robinus Syngkon na ka AITC, ma J. Treilang Suchiang na ka UDP, ma Chemhok Garod na ka PDF bad u ma Richard Sing Lyngdoh. Na ka 4-Mowkaiaw 5 ngut ki long u ma Nujorki Sungoh na ka UDP, ma Lasting Suchiang na ka AITC, Nehemayah Tyngkan na ka INC, ma Habahun Dkhar na ka NPP bad ma Corentis Rabon u kyrtong ka BJP. Katba na ka 7-Amlarem Constituency ki don 5 ngut kita u ma Lahkmen Rymbui na ka UDP, ma Stephanson Mukhim na ka NPP, ma Arbiang Kam Kharsohmat na ka Congress, u ma Aiban Gashnga na ka AITC bad ma Firstborn Manner na ka BJP.
Mynta ka sngi 7 tarik ki don lai ngut kiba wan thep kyrteng ha DC ophis Jowai kita u ma Wailadmiki Shylla u kyrtong ka NPP, ma Allan Keith Suchiang u kyrtong jong ka BJP baroh ar kin ïakhun na ka 2-Jowai Constituency bad ma Corentis Rabon u kyrtong ka BJP na ka 4-Mowkaiaw.
Na ka liang u ma Wailadmiki Shylla ha ka jingkren sha ki lad pathai khubor ula ong ba ka jingïakhun biang jong u ha kane ka kynti dei da ka jingshaniah bad ka jingieit jongki paidbah. U ong hapoh kine ki san snem “Nga la pyrshang ban pyndep ïa ki project kiba dang sah kum ka Umngot Water Supply Scheme, kumjuh ïa ka Iawmusiang Complex hynrei na ka daw ba u Contractor u la sangeh ban trei ïa ka ïew bad kane ka kam kala poi sha ka jingïaleh kes”. Ha ka jingïadei bad ka B.Ed College hapoh ka Jowai, u ong la don ka order na ka sorkar ba dei ban don lang ka BA bad B.Ed hynrei na ka daw jong ka jingwan ka khlam Covid kane ka kam ka dang sha teng, lada ym pat wan kane ka Election la tikna ban ïoh sdang noh ha kine ki bnai ban wan, ong maWailad.
Ha kaba ïadei bad ka jingkhuid jingsuba ula buh jingkylli balei la 28 snem ba la dep kiwei pat ki nongmihkhmat kim lah ban pynbeit ïa kane hynrei u ong pat ‘Nga dang long MLA tang 5 snem la da ym don sa ka khlam Covid 2 snem ula tikna ban pynbeit ïa kane da kaba kyntu ïa ki paidbah ban ai lad sa shi Term ïa u khnang ba un pyndep noh ïa kane ka jingeh namar wat ïa ki jingdonkam jong ka Municipal ula dep ban pynim biang.
Shuh shuh u ong ba u don ka jingkyrmen ban jop biang ïa kane ka Election na ka jingwan synran lang da ki hajar ngut ki paidbah mynta ka sngi, ula ong ruh ba ki nongthep vote hapoh ka Jowai Constituency ki long kiba stad bad kim ju pynjop ïa uno uno u kyrtong (Candidate) tang shisien. Namar tang shisien ym lah hi ruh ban pyndep ïa ki kam ba sahteng. Ha kaba ïadei bad ka jaka sumar MCH kaba don ha Panaliar ula ong naduh u snem 2017 ïa ka Building la dep tei nadong shadong hynrei namar ka jingpynslem ban plie ïa ka kumta ula pyrshang ban pyntreikam noh da kaba thep kam ïa ki Doctor bad kiwei de bad u kyrmen ha kine ki shibnai arbnai kane ka jaka kan sdang ban treikam pura.
U ma Allan Keith Suchiang u kyrtong jong ka BJP na ka 2-Jowai Constituency haba kren sha ki lad pathai khubor hadien ula ong ‘Dei tad haduh ban da poi ka sngi ñiew Vote kaba lah ban batai mano ka jop bad mano ba rem’, hynrei na ka liang jong u un tur beit shakhmat. U ma Allan uba ju trei kum u Engineer ha ka tnad MeECL, mynta ka sngi ula pynpaw ba u don ka jingthrang ban shakri ïa ki paidbah nongshong shnong ka 2-Jowai Constituency. Ula ong ba ka por kala dei ïaki paidbah ban jied noh ïa ka party BJP, namar ba kane ka party ka ju ai ka jingïarap kaba pura ïa ki nongshong shnong ka jylla.
U la ong shuh shuh ba kino kino ki Constituency ba don ki MLA na ka BJP ki ïoh jingmyntoi shibun. Ula pynpaw ruh ba ka BJP kadei ka party kaba long ryntih bha ka rukom treikam, kumta u sngewkmen ban don ha kum kata ka party. Namar kata ula khot la wer ïa ki paidbah ka 2-Jowai ban pynjop ïa u ha kane ka kynti.
Katba u ma Corentis Rabon u kyrtong ka BJP na ka 4-Mowkaiaw ha ka jingkren ula ong ka jingwan jong u sha ka jylli jong kasaiñ hima sima ka long kaba khia bha haduh katta katta, kumta da ka jingsngewkhia um banse banïakhun ïa kane ka Election ban wanrah ïa ki kam pynroi kiba dang sahteng hapoh ka 4-Mowkaiaw Constituency.
“Ka jylla kala dap 50 snem hynrei kijingkylla kim don satia”, kumta na ka liang jong u, ula phai khmat syndon sha kane ka party BJP kaba long ka party heh kaba lah ban trei na ka bynta ki paidbah da kaba kyntu ïa ki paidbah ban ai ka jingkyrshan ba pura ïa u ha kane ka kynti.
